"Bir aydan çox idi ki, səhhətimdə bu proses gedirdi. Ürəyimin sancmalarından hiss edirdim. Elə məsələlərdə çox dərinə gedən insan deyiləm. Teatrda işlərim çoxaldı. Səhər saat 10:00-dan axşam saat 10-a kimi hər gün işləyirdim. İşləyəndə də hər fasilə yarandıqda qaçırdım siqaret çəkməyə. Özüm də hiss edirdim ki, siqaret çəkməklə ürəyimi yükləyirəm".
Bu sözləri Əməkdar artist Vahid Əliyev "Təsir dairəsi" verilişinə açıqlamasında deyib.
Bir neçə gün əvvəl infarkt keçirən aktyor səhhətindən danışıb:
"Verilişdən evə gələndə ürəyimdə ağrı hiss etdim. Gəlinə dedim ki, dərman versin. Dərman içsəm də, gördüm ki, o xına, bu xına deyil. Yatdım. Gecə saat 2 radələri idi, ürəyim çox möhkəm ağrımağa başladı. Dərhal həyat yoldaşıma vəziyyətimin pis olduğunu söylədim. Evə təcili tibbi yardım çağırdıq. Onlar gəlib məni müayinə etdilər. Səhərə kimi yata bilmədim. Canınızın qədrini bilin. Əgər zamanında sağlamlığınızın qədrini bilməsəniz, mənim günümə düşəcəksiniz. Özüm sanki bilərəkdən bu yolu gedirdim".
///axşam.az
