Niderlandın ən böyük maliyyə qrupu olan "ING Group” Azərbaycanla bağlı inflyasiya proqnozunu yenidən nəzərdən keçirib.
2025-ci il üzrə inflyasiya proqnozu 5,3%-dən 5,4%-ə, 2026-cı il üzrə 5,1%-dən 5,3%-ə kimi artırıb. Bankın 2027-ci il üzrə inflyasiya gözləntisi isə 8,9 faiz təşkil edib.
İqtisadiyyat Nazirliyinin proqnozlarına görə, ötən il ölkədə orta illik inflyasiya 5,1 %, bu il isə 4,3 % təşkil edəcək. Azərbaycan Mərkəzi Bankının 2025-ci ilin yanvar ayında yenilənmiş proqnozuna görə, ötən ildə inflyasiya 5,5 %, 2026-cı ildə isə 3,8 % təşkil edəcək.
Göründüyü kimi illik infilyasiya 5 faiz üzərindədir. Bu da o deməkdir ki, qiymətlər ötən ildə olduğu kimi bu il də artacaq.
Nəzərə alaq ki, son 7-8 ildə ölkəmizdə qiymətlər bir qayda olaraq yüksəlir. Halbuki əvvəlki illərdə qiymətlər bəzən sabitləşirdi. Hətta müəyyən dövrdə qiymətlərdə düşüş müşahidə edilirdi. Lakin son bir neçə ildə qiymətlər ancaq yüksəlir.
Səbəb nədir?
Mövzu ilə bağlı Bizim.Media-ya danışan iqtisadçı Natiq Cəfərli deyib ki, qiymətlərin artmasının çoxsaylı səbəbləri var:
"Bir səbəb daxili istehsalın az olmasıdır. Digər səbəb idxal infilyasiyasından asılılıqdır. Biz idxaldan çox asılı ölkəyik. Təkcə ərzaqda yox, qeyri-ərzaq məhsullarında da idxaldan asılılıq yüksəkdir.
Bu səbəbdən də dünyada qiymət artımı anındaca ölkəmizdəki qiymətlərə təsir göstərir. Amma əsas səbəb yerli istehsalın az olması, eyni zamanda requlyativ aktların, cərimələrin və nəzarət edən orqanların çox olmasıdır.
Qeyd edək ki, biznes requlyativ aktlara, cərimələrə nə qədər çox pul ödəyirsə, bir o qədər də qiyməti artırır”.
\bizim.media
