Azxeber.com-un “Media forum” saytına istinadən məlumatına görə, müraciəti Azərbaycan Pen-klubunun rəhbəri Çingiz Abdullayev və Gənclərin Hüquqlarını Müdafiə Komitəsinin üzvləri edib.
İyulun 9-da Beynəlxalq Mətbuat Mərkəzində keçirilən tədbirdə səsləndirilən müraciətdə qeyd edilir ki, indiyədək gənc şairlərə qarşı rəsmi ittiham irəli sürülməyib, amma fərziyyələr səsləndirilir, onlar casusluqda günahlandırılır: “Rəsmi dövlət orqanları bu haqda heç nə demir. İran Azərbaycan Xarici İşlər Nazirliyinin beş notasına yarımçıq cavab verib, gənclərin harada saxlandığı açıqlanmayıb”. Çingiz Abdullayev tədbirdə deyib ki, Pen-klub yanında Gənclərin Hüquqlarını Müdafiə Komitəsi yaradılıb: “Biz o gənclərin buraxılmasına nail olmalıyıq. Rəsmi olmasa da, İran onları İsrailə casusluq etməkdə günahlandırır. Bu, ağlabatan deyil. İsrail özü daha yaxşı işləyən kəşfiyyatçılara malikdir, bu ölkənin bizim gənclərdən istifadə etməyə ehtiyacı yoxdur”. Yazıçı bildirib ki, İranın hərəkətində narazı qalsa da, bu ölkənin əleyhinə danışmaq niyyətində deyil: “Heç kim mənim İran əleyhinə danışmağımı eşitməyəcək. Çünki İranla Azərbaycan arasında münasibətlərin pisləşməsini istəyən qüvvələr var”. Çingiz Abdullayevin sözlərinə görə, daha on gün gözləyəcəklər, İran prezidenti Mahmud Əhmədinejad onları qəbul etməyə razılıq versə, bu ölkəyə yollanacaqlar: “Şəxsən mən də getməyə hazıram. İrana vəkil göndərmək barədə razılığa gəlmişdik. Amma hesab edirəm ki, vəkil İranın özündən tutulsa, daha yaxşı olar”.
