İran ordusu "Saeqe" əməliyyatının 25-ci mərhələsi çərçivəsində Küveytdə yerləşən ABŞ hərbi obyektlərinə pilotsuz uçuş aparatları ilə zərbələr endirib.
Bu barədə "Tasnım” agentliyi məlumat yayıb.
Məlumata görə, zərbələr ABŞ ordusunun Əl-Ədiri düşərgəsindəki avadanlıq anbarına, Əd-Doha hərbi bazasında yerləşən ABŞ hərbçilərinin dislokasiya məntəqəsinə, eləcə də Ərifcan düşərgəsindəki ABŞ qüvvələrinin yerləşdiyi əraziyə "Arəş" tipli kamikadze pilotsuz uçuş aparatları ilə endirilib.
İran ordusu bəyan edib ki, bu əməliyyatlar ABŞ-ın hərəkətlərinə cavab olaraq həyata keçirilib və davam etdiriləcək.
Bəyanatda həmçinin ABŞ Prezidenti Donald Trampın təhdidlərinin İran xalqının və silahlı qüvvələrinin iradəsini daha da möhkəmləndirdiyi iddia olunub.
İran ordusu əlavə edib ki, regionda yeni cəbhənin açılması və ya hər hansı yeni hərbi addımın atılması rəqib üçün növbəti strateji səhv olacaq və bunun nəticələri həmin tərəf üçün ağır olacaq.
