İranın Ali Milli Təhlükəsizlik Şurasının baş katibi Məhəmməd Baqir Zülqədr ölkəsinə qarşı həyata keçirilən son hücumlarla bağlı sərt bəyanatla çıxış edib.
AZXEBER.COM xarici KİV-ə istinadən xəbər verir ki, o, ölkəsinin infrastrukturuna edilən hər bir hücumun cavabsız qalmayacağını bildirib.
"Daha əvvəl də bəyan etdiyimiz kimi, infrastrukturumuza yönələn hər bir hücuma eyni şəkildə cavab veriləcək. Bu hücumların arxasında duran sionist rejim İsrail də döyüşçülərin verəcəyi cavabdan sonra özünü təhlükəsiz hiss etməyəcək", – deyə Zülqədr vurğulayıb.
İran rəsmisi ABŞ Prezidenti Donald Trampın İran rəhbərliyinə ünvanladığı sərt ifadələrə də münasibət bildirib. O, Trampın İran xalqına qarşı səsləndirdiyi fikirləri tənqid edərək, bunların ona yaraşan açıqlamalar olduğunu söyləyib.
Xatırladaq ki, Donald Tramp Ankarada keçirilən NATO Zirvəsində İranla əldə olunmuş atəşkəsin başa çatdığını açıqlamış və İran rəhbərliyini sərt ifadələrlə tənqid etmişdi.
Qeyd edək ki, ABŞ və İran arasında müharibənin dayandırılması məqsədilə iyunun 14-də İslamabad razılaşması imzalanmış, yekun saziş üçün 60 günlük danışıqlar müddəti nəzərdə tutulmuşdu. Lakin ABŞ ordusunun 8 iyulda İrana qarşı yeni hücumlara başlamasından sonra Tehran da cavab olaraq regiondakı ABŞ hərbi bazalarını hədəfə almışdı.
Gülay
