"İranın Azərbaycanın Naxçıvan bölgəsinə etdiyi hücumlar dərin narahatlıq doğurur və qəbuledilməzdir”.
Bu sözləri AZXEBER.COM-a açıqlamasında beynəlxalq münasibətlər üzrə pakistanlı ekspert Xalid Teymur Əkrəm deyib.
O bildirib ki, mülki şəxslərin hədəfə alınması regionda sülh ciddi zərbədir:
"Günahsız mülki şəxslərin hədəfə alınması və hərbi aqressiya yalnız tərəflər arasında sülhə təhlükə yaratmır, həm də regionda sülh və sabitliyə ciddi zərər vurur. Bu cür hücumlar və hadisələr bütün beynəlxalq ictimaiyyət tərəfindən qəti şəkildə pislənilməlidir. Qardaş xalqa qarşı səbəbsiz hücumlar etmək doğru addım deyil”.
Ekspert deyib ki, belə şəraitdə beynəlxalq ictimaiyyət Azərbaycanın yanında olmalıdır:
"Bu şəraitdə beynəlxalq ictimaiyyət irəli çıxmalı və Azərbaycanın yanında olmalıdır. Sülhə, suverenliyə və beynəlxalq hüquqa sadiq olan ölkələrin bir-birini dəstəkləməsi və gərginliyin azaldılması istiqamətində çalışması həyati əhəmiyyət daşıyır. Sabitliyin bərpası və mülki insanların təhlükəsizliyinin təmin olunması üçün diplomatik səylər və dialoq çox vacibdir”.
X.T. Əkrəm qeyd edib ki, bütün tərəflər gərginliyi artıracaq addımlardan çəkinməlidir:
"Ölkələr arasında dostluq, qarşılıqlı hörmət və əməkdaşlıq belə çətinliklərlə birlikdə mübarizə aparmağın əsas şərtidir. Dövlətlər aqressiyaya, terrorizmə və regional təhlükəsizliyi sarsıdan hər cür təhdidlərə qarşı birlikdə dayanmalıdır. Fikrimcə, bütün tərəflər humanitar məsələləri prioritet hesab etməli və gərginliyi daha da artıracaq addımlardan çəkinməlidir”.
Şahanə Ziyad
