Azərbaycanda fəaliyyət göstərən gənclər təşkilatları bəyanat yayıb. AXCP Gənclər Komitəsi, Müsavat Gənclər, Təşkilatı, NİDA vətəndaş hərəkatı, VHP Gənclər Təşkilatı, Dalğa Hərəkatı, Müsbət Dəyişiklik Gənclər Hərəkatı, Gənclər Klubu İB və Azad Gənclik Təşkilatının birgə səsləndirdiyi bəyanatda bildirilib ki, hazırda ölkə seçki ili üçün heç də uyğun mühitdə deyil.
Bəyanatda o da qeyd edilib ki, seçki mühitinin yoxa çıxması 2013-cü ilin əvvəlində gənclər tərəfindən təşkil olunmuş və gənclərin iştirakı ilə keçirilmiş kütləvi aksiyalarda iştirak edən gənclərin cərimələnməsi ilə başlanılıb. Onlar bunu gənclərin söz azadlığının qarşısını almaq kimi qiymətləndirərək, cərimələrin sırf gənclərə sədd olmaq məqsədi ilə tətbiq olunduğunu bildiriblər.
"İrəli" İctimai birliyinin sədri Rauf Mərdiyev AZXEBER.COM-a açıqlamasında bəyanata münasibət bildirib.
R. Mərdiyev deyib ki, Azərbaycan müxalifəti hazırda bir-birini əzməyə çalışır:"Radikal müxalifət qarşıdan gələn seçkilərdə uğur qazana bilməyəcəklərinə əmin olduğu üçün özünü sığortalamağa çalışır. Azərbaycanda seçki ab-havasının olmaması yerinə "müxalifət cəbhəsində seçki ab-havası yoxdur" fikrini işlətmək daha doğru olardı. Son dövrlər baş verən hadisələr bir daha onu göstərir ki, radikal müxalifət liderləri şəxsi maraqları uğrunda bir-biriləri ilə amansız mübarizə aparırlar. Bu gün radikal müxalifət partiyaları seçicilərlə, elektoratla iş aparmır, öz nəzarətlərində olan mətbuat orqanları vasitəsilə biri-birlərini əzməyə çalışırlar.
"İrəli" sədri bu cür bəyanatları qeyri-ciddi adlandırıb: "Şübhəsiz ki, Nida, Azad Gənclik və s. kimi gənclər təşkilatları da müxalifət boss-ları arasındakı bu mübarizədə vasitə kimi istifadə olunurlar. Bu təşkilatların daxilində gənclərə molotov kokteyli hazırlatdırılır, onlara anarxist vətəndaş obrazı təbliğ olunur və çox təəssüf olsun ki, bəzi gənclər radikal müxalifət liderlərinin siyasi ambisiyalarının qurbanı olurlar. Mən bu tip bəyənatları ciddi saymır, müxalifətin qarşıdan gələn seçki uğursuzluğundan sonra özlərini sığortalamaya hazırlıq cəhdi kimi qəbul edirəm".
Fatimə İbrahimova
