"İRƏLİ” İctimai Birliyi tərəfindən Xocalı soyqırımının 33-cü il dönümünə həsr olunmuş tədbirlər həyata keçirilib.
AZXEBER.COM xəbər verir ki, "İRƏLİ” İctimai Birliyinin nümayəndələri və üzvləri faciə qurbanlarının xatirəsinə ucaldılmış "Ana harayı” abidəsini ziyarət ediblər.
"Xocalıya ədalət!” kampaniyası çərçivəsində Beynəlxalq Muğam Mərkəzində "Xocalıya ədalət!” adlı tədbir keçirilib. Tədbirin əvvəlində Azərbaycan Respublikasının Dövlət Himni səsləndirilib, işirakçılar soyqırımı qurbanlarının xatirəsini bir dəqiqəlik sükutla yad edib.
"İRƏLİ” İctimai Biliyinin sədri Şahin Rəhmanlı çıxış edərək 33 il ötməsinə baxmayaraq, hələ də beynəlxalq ictimaiyyət tərəfindən bu hadisəyə tam hüquqi-siyasi qiymət verilməməsini, lakin 2023-cü il sentyabr ayında keçirilən lokal xarakterli antiterror tədbirləri nəticəsində Xocalı şəhərində də dövlət suverenliyinin tam təmin olunmasını qeyd edib. Eyni zamanda, Xocalı həqiqətlərini qlobal şəkildə çatdırmaq məqsədilə Heydər Əliyev Fondunun vitse-prezidenti Leyla xanım Əliyevanın təşəbbüsü ilə yaradılan "Xocalıya ədalət!” beynəlxalq maarifləndirmə kampaniyasının geniş fəaliyyəti diqqətə çatdırılıb.
Tədbrin davamında Cahangir Cahangirov adına xor kollektivi və istedadlı gənclərin təqdimatında müxtəlif musiqi əsərləri ifa olunub, poeziya nümunələri səsləndirilib.
Tədbirlər çərçivəsində birliyin üzvləri Xocalı soyqırımı haqqında məlumatların dünya ictimaiyyətinə çatdırılması məqsədilə sosial şəbəkələrdə də fəal şəkildə təşkilatlanıblar. Kampaniya çərçivəsində gənclər tərəfindən "X” sosial şəbəkə platforması üzərindən #JusticeforKhojaly heşteqindən istifadə etməklə Xocalı həqiqətləri ilə bağlı infoqrafik tvitlərin paylaşılması davam edir.
Həyata keçirilmiş tədbirlər planının əsas məqsədi Xocalı soyqırımı qurbanlarının xatirəsinin yad edilməsi, bu hadisələrin yaddaşlarda yaşaması, eyni zamanda törədilmiş cinayətlərin beynəlxalq miqyasda sosial şəbəkə istifadəçilərinə çatdırılmasıdır.
