22 İyul – Milli Mətbuat və Jurnalistika Günü münasibətilə İsmayıllı Rayon İcra Hakimiyyətinin təşkilatçılığı ilə bir qrup media nümayəndəsinin İsmayıllı rayonuna mediaturu təşkil edilib.
AZXEBER.COM xəbər verir ki, mediatur çərçivəsində jurnalistlər rayonda həyata keçirilən abadlıq-quruculuq işləri, eləcə də turizm və sənaye potensialı ilə tanış olublar. Bu məqsədlə media nümayəndələri Basqal qəsəbəsinə, həmçinin Buynuz, Qalacıq, İvanovka və Hacıhətəmli kəndlərinə səfər ediblər.
İsmayıllı Rayon İcra Hakimiyyətinin başçısı Nahid Bağırov media nümayəndələrini peşə bayramı münasibətilə təbrik edərək ölkədə peşəkar mətbuatın inkişafı, söz və ifadə azadlığının təmin olunması istiqamətində həyata keçirilən dövlət siyasətindən danışıb.
Media nümayəndələri isə onlara göstərilən diqqət və qayğıya görə təşəkkürlərini bildirərək, ölkənin müxtəlif bölgələrində dəqiq, qərəzsiz və operativ məlumatların əldə olunması və ictimaiyyətə çatdırılması üçün yaradılan əlverişli şəraiti yüksək qiymətləndiriblər.
