İspaniya Xarici İşlər naziri Arança Qonzalez Laya Heydər Əliyev Mərkəzinin binasının üzərində İspaniya bayrağının işıqlandırılması ilə verdiyi həmrəylik ismarışına görə Azərbaycana təşəkkür edib.
İspaniya XİN başçısı mayın 20-də Azərbaycanın Xarici İşlər naziri Elmar Məmmədyarovla telefon danışığı zamanı ölkəsinin minnətdarlığını çatdırıb.
Arança Qonzalez Laya həmçinin qlobal sağlamlıq böhranına qarşı birgə mübarizəyə dəstək ifadə edən məktubuna görə Azərbaycanlı həmkarına təşəkkürünü ifadə edib.
Qeyd edək ki, aprelin 3-dən başlayaraq hər gün koronavirusdan zərər çəkən dövlətlərin bayraqları həmin ölkələrin musiqisinin müşayiəti ilə mərkəzin binası üzərinə proyeksiya olunub. Bununla Heydər Əliyev Mərkəzi COVID-19-un geniş yayıldığı dövlətlərə və onların xalqlarına dəstəyini, hörmət və ehtiramını ifadə edir.
Koronavirus xəstəliyinin geniş yayıldığı Çin, Fransa, Almaniya, İran, İtaliya, Rusiya, İspaniya, Türkiyə, Böyük Britaniya, ABŞ, Gürcüstan və Avropa İttifaqının bayraqları Mərkəzin binasının üzərində nümayiş olunub.
///Report
