İstidə avtomobil aptekçanızdakı bu 6 dərmana diqqət edin - XƏBƏRDARLIQ » Azxeber.com Azərbaycanda özəl xəbərlər, araşdırmalar, təhlillər və müsahibələrin tək ünvanı

Yay aylarında avtomobilin salonu əsl "isti tələsinə" çevrilir. Hətta mülayim günəşli gündə belə, salonda temperatur qısa müddətdə 50–60 dərəcəyədək yüksələ bilir.

Aptekçanın adətən "bardaçok"da və ya oturacağın altında saxlandığını nəzərə alsaq, bu cür yüksək temperaturda dərmanlar nəinki öz effektivliyini itirir, həm də parçalanaraq toksik (zəhərli) maddələrə çevrilə bilirlər.

Therapevt Yelena Pavlovanın sözlərinə görə, avtomobil aptekçasını saxlamaq üçün ideal yer soyuducu-çanta və ya termokonteynerlərdir:

"Avtomobildəki dərmanları qablaşdırmanın üzərindəki yararlılıq müddətindən asılı olmayaraq, ildə iki dəfə – yazda və payızda yeniləmək lazımdır. Yalnız müddəti deyil, dərmanın xarici görkəmini, qoxusunu və qablaşdırmanın bütövlüyünü də yoxlayın. Avtomobilin iqlimi dərmanlara qarşı rəhmsizdir və yeni bir blisterə qənaət etmək fəsadlara yol aça bilər".

Maye və ampula formaları (məsələn, analgetiklər, vitaminlər): Yüksək temperaturda tərkibindəki aktiv maddələr çökür, rəngi dəyişir və toksikləşir.

Hormonal preparatlar və İnsulin: İstidə zülal strukturları dərhal parçalanır və preparat tamamilə yararsız hala düşür.

Ürək qlikozidləri və Nitroqliserin: Bu həyat xilas edən dərmanlar istiyə çox həssasdır. Nitroqliserin qızdıqda tərkibini dəyişərək güclü baş ağrılarına və kəskin təzyiq düşməsinə səbəb ola bilər.

Antibiotiklər (xüsusən suspenziyalar): İstidə kimyəvi quruluşu pozulur və bədəndə ağır allergik reaksiyalar və ya zəhərlənmə verə bilər.

Şamlar (Suppozitorilər): 30 dərəcədən yuxarı temperaturda əriyərək formasını itirir, tərkibindəki maddələr qeyri-bərabər paylanır.

Məlhəmlər və gellər: İstidə əsas maddə yağ və suya ayrılır, tərkibindəki bəzi komponentlər isə dəridə yanıq və ya qıcıqlanma yarada biləcək fərqli birləşmələrə çevrilir.

Qanunvericiliklə təsdiq olunmuş standart avtomobil aptekçası, mahiyyət etibarilə, xilasedici dəstidir. Orada əsas vurğu sarğı materialları, turniketlər (jqut), qayçı, əlcəklər və süni tənəffüs üçün maskalara qoyulur.

Lakin sürücülər özləri ilə aşağıdakı əlavə preparatları da götürə bilərlər (onları mütəmadi yeniləmək və istidən qorumaq şərtilə):

Asetilsalisil turşusu (Aspirin): Döş qəfəsində sıxıcı ağrılar zamanı tromb yaranmasının qarşısını almaq üçün çeynənilməlidir.

Antihistamin (allergiya əleyhinə) vasitələr: Arı və ya digər həşərat sancmaları zamanı yarana biləcək kəskin boğulma və şişkinliyin qarşısını almaq üçün mütləqdir.

Regidron (və ya digər elektrolit tozları): Günvurma, həddindən artıq qızma və ya qəfil ishal zamanı bədənin su-duz balansını bərpa etmək üçün istifadə olunur.

Ağrıkəsicilər və qızdırmasalıcılar: İbuprofen, parasetamol və s. kimi zəruri əlavələr.

/Bizim.media