“Azad və ədalətli seçkilər uğrunda” Jurnalist-QHT Koalisiyası Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə reallaşdırılan “2013-cü il prezident seçkilərinin monitoriniqi” layihəsi çərçivəsindəki növbəti görüşünü sentyabrın 12-də Şəkinin Kiş kəndində keçirib. 200-dən artıq seçicinin qatıldığı tədbirdə seçkidə müşahidənin aparılması qaydaları, müşahidəçilərin hüquq və vəzifələri, müşahidəçilərin qeydiyyatı prosedurları və s. mövzularda məlumatlar verilib insanlarla qarşılıqlı fikir mübadiləsi aparılıb.
Toplantını giriş sözü ilə Qəbələ Regional QHT-lərin Resurs və Təlim Mərkəzinin rəhbəri Qalib Nəbiyev açaraq seçkinin cəmiyyət həyatında son dərəcə mühüm hadisə olduğunu vurğulayıb. Müxtəlif ictimai institutların seçki prosesində fəal iştirak etdiyini deyən Q.Nəbiyev əsas hədəfin vətəndaşların konstitusiyon hüquqlarını reallaşdırmalarına müvafiq dəstək göstərmək olduğunu vurğuladı. O bu günki tədbirin keçirilməsi ilə jurnalistlərin də cəmiyyətin fəal təbəqəsi kimi vətəndaş cəmiyyəti quruculuğuna töhfələrini verdiyini bildirdi.
“Azad və ədalətli seçkilər uğrunda” Jurnalist-QHT Koalisiyasının rəhbəri Seymur Verdizadə Şəkidə üç seçki dairəsinin fəaliyyət göstərdiyini vurğulayaraq rayonun seçici potensialı baxımından zənginliyinə diqqət çəkib. O qeyd edib ki, Jurnalist QHT Koalisiyası məhz bu səbəbdən bölgəni özünün fəaliyyət dairəsinə daxil edib. S. Verdizadə Kişin tarixi ənənələrə malik yaşayış məntəqəsi olduğunu və Şəkinin həyatında mühüm rol oynadığını bildirib.
S.Verdizadə 9 oktyabr prezident seçkisinin vətəndaşların iradəsindən asılı olacaq proses kimi dəyərləndirib: «Seçkidə yalnız dövlət başçısı seçilmir, eyni zamanda ölkənin taleyi, qarşıdakı illərdə bütün sahələr üzrə tutacağı mövqe müəyyənləşir. Bu mövqe isə ideyalarda, fikirlərdə yaranır. Vətəndaşlar namizədlərin ideya və fikirlərini təhlil edir, qərar verərək seçimlərini edirlər. Jurnalist-QHT Koalisiyasının əsas məqsədi də azad sözün və demokratik fikrin ifadəçisi kimi jurnalistikanın vətəndaşların seçkiyə köklənməsinə, onların fəal şəkildə prosesdə iştirakına dəstək olmaqdır».
S.Verdizadə çıxışında seçki prosesinin ümumi, bərabər, ədalətli, gizli, azad, şəffaf və demokratik qaydada təşkili üçün tələb olunan şərtlər və standartlar barədə də ətraflı məlumat verib. Həmçinin, səsvermənin qaydaları, seçici siyahıları, prezident seçkilərinin nəticələrinin elan olunması ilə bağlı qanunvericiliyin müddəalarına dair fikirlərini bölüşüb.
«RUH» Azərbaycan Jurnalistləri Müdaifə Komitəsinin icraçı direktoru Əvəz Rüstəmov vətəndaşların seçki fəallığının həm də beynəlxalq aləmə mesaj xarakteri daşıdığını vurğulayıb. «Bu mənada seçki həm də bizlərə münasibəti formalaşdıran mədəniyyət etalonudur. Bizlər prosesdə iştirakla özümüzü təsdiqləmiş oluruq. Həmçinin fəal vətəndaş mövqeyimizi bildirməklə beynəlxalq müstəvidə ölkəmizə və bir azərbaycanlı kimi varlığımıza yönələn mənfi meyllərin qarşısını alırıq», - deyən Ə.Rüstəmov fəal ictimai institut kimi medianın cəmiyyət həyatında oynadığı rola dair konkret faktlardan bəhs edərək fikirlərini səsləndirib.
Ayrı-ayrı çıxışlarda seçki hüququnun insanların fendamental hüquqlarından olduğu vurğulanıb, vətəndaş cəmiyyəti instutularının, eləcə də medianın geniş ictimaiyyətlə əlaqələrinin müxtəlif aspektləri təhlil olunub. Xüsusən də jurnalistikanın cəmiyyət həyatında oynadığı rolun ayrı-ayrı təzahür formaları üzərində dayanılıb.
Qeyd edək ki, sıralarında “Əqli Mülkiyyətçilərə Kömək”, “Zərdabi Mətbuat Mərkəzi”, “Yeni Media Jurnalistləri”, “Media və Monitorinq Araşdırması”, “Cəmiyyətin inkişafında vətəndaş məsuliyyəti” ictimai birliklərini birləşdirən “Azad və ədalətli seçkilər uğrunda” Jurnalist QHT Koalisiyası “2013-cü il prezident seçkilərinin monitoriniq” layihəsi çərçivəsində namizədlərin irəli sürülməsi, namizədlərin imzatoplama kampaniyası, onların qeydiyyatı prosesi, seçkiqabağı təbliğat və təşviqat kampaniyasında gündəlik nəşrlər və internet mediada seçkilərin işıqlandırılmasının monitorinqini aparacaq. Koalisiya eyni zamanda 9 oktyabrda 150 seçki məntəqəsində müşahidə prosesini həyata keçirməyi nəzərdə tutur.
