Jurnalist Araşdırmaları Mərkəzi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Sosial problemlərin həllində region gənclərinin iştirakının dəstəklənməsi” adlı layihənin icrasına başlayıb. Bu barədə AZXEBER.COM-a layihənin koordinatoru Seymur Verdizadə məlumat verib.
S.Verdizadə deyib ki, layihənin həyata keçirilməsində əsas məqsəd region gənclərini yerli sosial problemlərin həllinə cəlb etmək, onların QHT və KİV-lərlə əlaqələrini inkişaf etdirmək, gənclərin vətəndaş cəmiyyəti quruculuğunda fəal iştirakına nail olmaqdır. Koordinator bildirib ki, layihə çərçivəsində Cəlilabad, Biləsuvar və Tovuz rayonlarında gənclərin iştirakı ilə təlimlərin keçirilməsi nəzərdə tutulub: “Gənclər arasında maarifləndirmə prosesini sürətləndirmək üçün xüsusi broşuraların çapı da planlaşdırılır, Yüksək tirajla nəşr olunacaq bu broşuralar regionlarda pulsuz paylanılacaq”.
