Xəbər verdiyimiz kimi, Ermənistanın Korrupsiyaya Qarşı Mübarizə Komitəsi Robert Köçəryanı və oğlu Sedrakı saxlayıb.
Ermənistanın sabiq prezidenti Robert Köçəryana qarşı üç maddə üzrə cinayət işi açılıb.
24 avqustda Baş prokuror Ermənistan Respublikasının ikinci Prezidenti Robert Köçəryana qarşı vəzifə səlahiyyətlərindən sui-istifadə, xüsusilə külli miqdarda rüşvət alma və çirkli pulların yuyulması maddələri ilə bağlı ictimai cinayət təqibi başladıb.
Eyni zamanda, daha doqquz nəfərə qarşı, o cümlədən Köçəryanın oğlu Sedrak, keçmiş müdafiə naziri S.S. (2000-2007-ci illərdə bu vəzifəni Ermənistanın üçüncü prezidenti Serj Sərkisyan tutub), keçmiş baş nazir A.M. (Andranik Marqaryan 2000-2007-ci illərdə Ermənistanın baş naziri olub), İrəvanın sabiq meri Q.B. (Qagik Beqlaryan) və digərlərinə cinayət işi açılıb.
Erməni jurnalist və blogger Natali Aleksanyan AZXEBER.COM-a açıqlamasında deyib ki, Robert Köçaryan illər boyu Ermənistan Respublikasını qarət edib:
"Robert Köçaryan illər boyu Ermənistan Respublikasını qarət edib. Robert Köçaryan illər ərzində erməni-azərbaycanlı münasibətlərinə nifaq salan Qarabağ klanının ən mühüm nümayəndələrindən biridir. Onun hakimiyyəti illərində Ermənistan talan edildi, bir çox dövlət strukturları və aktivlər özəlləşdirildi, İrəvanın ən yaxşı əraziləri qəpik-quruşa alınaraq şəxsi bizneslərə və biznes mərkəzlərinə çevrildi”.
O qeyd edib ki, Köçaryan ailəsinin əmlakının mənşəyi ilə bağlı çox ciddi suallar mövcuddur:
"Əgər Korrupsiyaya Qarşı Mübarizə Komitəsinin açıqladığı fakt və məlumatları əsas götürsək, Köçaryan ailəsinin əmlakının mənşəyi ilə bağlı çox ciddi suallar mövcuddur. Bu əmlakın əldə edilməsinin hallarına tam şəkildə araşdırılmalıdır. Əminəm ki, bu dəfə Robert Köçaryanı və oğlu Sedrak Köçaryanı belə asanlıqla buraxmayacaqlar. Çünki faktiki olaraq bütün maliyyə zənciri bu işə bağlanıb. Açığı, Korrupsiyaya Qarşı Mübarizə Komitəsinin onun brilyantları, qızılları və mədənləri, eləcə də bu sahədə mümkün sövdələşmələri və əlaqələri ilə bağlı məsələləri niyə hələ də tam açıqlamadığına təəccüblənirəm. Əgər bu istiqamətdə faktlar varsa, onlar da cəmiyyətə təqdim edilməli və araşdırılmalıdır”.
N. Aleksanyan deyib ki, iki xalq arasında düşmənçiliyin sonrakı nəsillərə miras qalmasına səbəb olan siyasəti normal hesab etmək olmaz:
"Sedrak Köçaryanın iki ay müddətinə həbsdə saxlanılmasına gəlincə, düşünürəm ki, bu, daha böyük maliyyə sxemlərinin üzə çıxarılmasının yalnız başlanğıcı ola bilər. Hesab edirəm ki, bu iş çərçivəsində Köçaryanın hakimiyyəti illərində erməni və azərbaycanlı xalqları arasında düşmənçiliyin uzun illər ərzində qızışdırılması məsələsi də araşdırılmalıdır. İki xalq arasında düşmənçiliyin adi hala çevrilməsinə və sonrakı nəsillərə miras qalmasına səbəb olan siyasəti normal hesab etmək olmaz”.
Şahanə Ziyad
