Türkiyəli keçmiş milli futbolçu Ümit Karana qarşı narkotik istintaqında hazırlanmış ittiham aktının təfərrüatları ortaya çıxdı.
AZXEBER.COM Türkiyə mətbuatına istinadən xəbər verir ki, prokurorluq Karana "narkotik qaçaqmalçılığı" ittihamı ilə 10 ilə qədər həbs cəzası istəyib.
İddianamədə onun keçmiş sevgilisi Şule Naz Öztürkün də ifadələri var. Öztürk bildirib ki, Karan münasibətləri zamanı ona kokain verib. Başqa bir şahid isə Karanın maddəni kiçik torbalarda daşıdığını iddia edib.
İstintaq çərçivəsində aparılan məhkəmə ekspertizaları həm Ümit Karanın, həm də Şule Naz Öztürkün kokain istifadə etdiyini ortaya çıxarıb. Prokurorluq həmçinin HTS qeydlərinin və texniki ekspertizaların sənəddəki iddiaları dəstəklədiyini bildirib.
Ümit Karan ittihamları rədd edib.
Məhkəmənin yaxın günlərdə İstanbul Ağır Cinayət Məhkəməsində keçirilməsi gözlənilir.
Aysel
