Cənubi Koreya, ABŞ və Yaponiya xarici siyasət idarələrinin rəhbərləri üçtərəfli danışıqlar zamanı Şimali Koreyanın tam nüvəsizləşdirilməsinə dair mövqelərini bir daha təsdiqləyiblər.
AZXEBER.COM Koreya mediasına istinadla xəbər verir ki, Atlantada keçirilən "Böyük İyirmilik" (G20) qrupunun iclası çərçivəsində Cənubi Koreyanın xarici işlər naziri Ço Hyon, ABŞ Dövlət katibi Marko Rubio və Yaponiyanın xarici işlər naziri Toşimitsu Moteqinin görüşündə tərəflər Pxenyanı Koreya yarımadasında gərginliyin azaldılması və davamlı sülhün bərqərar edilməsi istiqamətindəki səylərə qoşulmağa çağırıb.
Cənubi Koreya Xarici İşlər Nazirliyinin açıqlamasında qeyd olunub ki, tərəflər Şimali Koreyaya qarşı sıx koordinasiya şəraitində güclü çəkindirmə mövqeyini qoruyub saxlamaq, eyni zamanda, dialoq və diplomatiya yolu ilə yarımadada sülh, sabitlik və nüvəsizləşdirməyə nail olmaq üçün səyləri davam etdirmək barədə razılığa gəliblər.
Nazir Ço Hyon Ço vurğulayıb ki, Cənubi Koreya Vaşinqtonla Pxenyan arasında dialoqun bərpası istiqamətində sülh təşəbbüskarı rolunu yerinə yetirəcək. Nazirlər, həmçinin Pxenyanın nüvə və ballistik raket proqramları üçün gəlir gətirən fəaliyyətləri qadağan edən BMT sanksiyalarının icrasının vacibliyini vurğulayıblar. Onlar, həmçinin Şimali Koreya tərəfindən sanksiyaların pozulması və onlardan yayınma hallarını ifşa etdiyinə görə çoxtərəfli sanksiyalara nəzarət qrupunun fəaliyyətini yüksək qiymətləndiriblər.
