Böyük Britaniyada sikkə və medalların zərbi ilə məşğul olan dövlət qurumu "Royal Mint" qeyri-adi istehsala başlayıb. Quruma məxsus müəssisədə İngiltərə Bankının köhnə telefonlarından qızıl çıxarılır.
AZXEBER.COM xəbər verir ki, bu barədə "Interia" məlumat yayıb.
Şəbəkənin inkişaf direktoru Şon Millardın sözlərinə görə, iki il əvvəl quraşdırılan xətt ildə təxminən 4 000 ton elektron tullantını emal edə bilir. Bu tullantılardan təxminən 400 kiloqram qızıl əldə olunur.
Əksər təkrar emal müəssisələrindən fərqli olaraq, burada elektron cihazlar əvvəlcə ayrı-ayrılıqda sökülür. Mis, tantal və hətta elektron platalardakı plastik ayrıca çeşidlənərək ixtisaslaşmış təkrar emal şirkətlərinə satılır.
Adətən elektronikadan qızılın çıxarılması çox yüksək temperaturda əridilmə və ya təhlükəli kimyəvi tullantılar yaradan aşındırıcı turşu qarışıqlarından istifadə yolu ilə həyata keçirilir. "Royal Mint" isə fərqli üsuldan istifadə edir.
Müəssisədə Kanadanın "Excir" şirkəti tərəfindən patentləşdirilmiş və qızılı otaq temperaturunda birbaşa həll edən proses tətbiq olunur. Bu proses üçün xarici enerji mənbəyi tələb olunmur və məhlul sonrakı tullantı partiyalarının emalı üçün dəfələrlə istifadə edilə bilər.
İngiltərə Bankının ofislərində istifadə olunan köhnə telefonlardan birinin tərkibində təxminən 30 milliqram qızıl olur. Bu, təxminən üç funt sterlinq dəyərindədir. Müasir smartfonda isə təxminən dörd funt sterlinq dəyərində qızıl olur.
Təmizlənmiş qızıldan "Royal Mint"in "886" adlı zinət əşyaları kolleksiyasının hazırlanmasında istifadə edilir. Kolleksiyanın adı "Royal Mint"in yarandığı ilə istinaddır.
Kolleksiyada təkrar emal edilmiş gümüşdən də istifadə olunur. Gümüşün bir hissəsi Britaniya xəstəxanalarının təhvil verdiyi köhnə rentgen filmlərinin emalından əldə edilir.
