7 avqust tarixində Marsol Group-un təşkilatçılığı ilə növbəti "İşgüzar Səhər Yeməyi” keçirilib.
AZXEBER.COM xəbər verir ki, tədbirdə Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov və Marsol Group partnyoru olan 50-yə yaxın sahibkar iştirak edib.
Tədbirdə Marsol Group-un təsisçisi və İş Adamları Cəmiyyətinin Milli Assosiasiyasının (İCMA) İdarə Heyətinin sədri Tural Mustafayev çıxış edərək sahibkarlığın inkişafı istiqamətində həyata keçirilən layihələr, işgüzar əlaqələrin genişləndirilməsi məqsədilə təşkil olunan görüşlər və bu platformaların biznes mühitinə verdiyi töhfələr barədə fikirlərini bölüşüb.
Daha sonra KOBİA-nın İdarə Heyətinin sədri Orxan Məmmədov çıxış edərək Agentliyin Marsol Group ilə birgə həyata keçirdiyi layihələr və təşkil olunan tədbirlərdən bəhs edib.
O, həmçinin KOBİA-nın sahibkarlara təqdim etdiyi dəstək mexanizmləri, dövlət–özəl sektor əməkdaşlığının əhəmiyyəti və bu istiqamətdə yaradılan imkanlar barədə iştirakçılara ətraflı məlumat verib. Görüş zamanı sahibkarlar da fəaliyyət göstərdikləri sahələr və təmsil etdikləri şirkətlər haqqında qısa təqdimatlar edərək bir-biriləri ilə yaxından tanış olub, yeni əməkdaşlıq imkanları ətrafında fikir mübadiləsi aparıblar. Tədbir iştirakçılar arasında işgüzar əlaqələrin möhkəmləndirilməsi, dövlət və özəl sektor arasında əməkdaşlığın inkişafı, eləcə də yeni biznes tərəfdaşlıqlarının formalaşdırılması baxımından məhsuldar müzakirələrlə yadda qalıb.
