Son günlər bir sıra müştərilər mağazalarda son istifadə tarixi keçmiş məhsulların satışa çıxarılmasından narazılıqlarını bildirirlər.
Bu məhsullar arasında kosmetik vasitələr də yer alır.
Bəzi müştərilər aldıqları məhsulun son istifadə tarixinin keçdiyini dərhal fərq etsələr də, bir çoxları bu məqama diqqət yetirmədən kosmetik vasitələrdən istifadə etməyə davam edir.
Maraqlıdır, son istifadə tarixi keçmiş kosmetik məhsulların dəriyə tətbiqi hansı fəsadlara səbəb ola bilər?
Məsələ ilə bağlı AZXEBER.COM-a danışan həkim-dermatoloq Quba Rüstəmova bildirib ki, vaxtı keçmiş kosmetik vasitələrin istifadəsi dəridə müxtəlif reaksiyalara səbəb ola bilər:
"Tarixi keçmiş kosmetik vasitələrin istifadəsi zamanı ilk növbədə orada aktiv olan təsiredici maddənin oksidləşməsi və parçalanması baş verir. Bu isə gözlənilən effektin azalmasına səbəb olur. Həmin insanlarda ani və gözlənilməz qızartılar, səpkilər yarana bilər. Əlavə olaraq, günəş altında qalmış, nəm və rütubətli mühitdə saxlanılan vasitələrə, o cümlədən maskara, layner, spreylər və kremlərə də eyni şəkildə oksidləşmə prosesi təsir edir. Bu isə dəridə qıcıqlanma və piqmentasiyaya gətirib çıxara bilər”.
Q. Rüstəmova vaxtı keçmiş kosmetik vasitələrdə mikrobioloji çirklənmə riskinin də artdığını vurğulayıb:
"Su bazlı kremlərdə isə konservasiya müddəti keçdiyinə görə göbələk və bakterial kontaminasiyanın yaranması daha asan olur. Bu da dərinin qoruyuculuq qabiliyyətinin zəifləməsinə və bakterial kontaminasiyanın yayılmasına gətirib çıxarır. Bu mikrobioloji çirklənmə əsasən dermatologiyada kontakt allergik dermatit, perioral dermatit və ekzemaların yayılmasına şərait yaradır. Praktikada daha çox rast gəldiyimiz hallardan biri də tərkibində bitki yağları, bitkilər və ekstraktlar olan məhsulların istifadəsidir. Onlar daha çox kontakt allergik dermatit reaksiyalarına səbəb olur. Allergik reaksiya yalnız qızartı ilə özünü göstərmir. Qaşınma, səpkilər və dəridə dartınma hissi kimi əlamətlərlə də özünü göstərə bilər”.
Fəridə Əsədzadə
