Lənkəranda kəndə girən canavarlar mal-qaraya hücum edib, təsərrüfat sahibinə 5000 manat ziyan vurub.
AZXEBER.COM oxu.az-a istinadən bildirir ki, hadisə rayonun Ürgə kəndində baş verib. Səhər saatlarında dənizkənarı otlaq ərazidə canavar iribuynuzlu heyvanlara hücum edib.
Kənd sakini və mal-qaranın sahibi Savalan Rəhimov hadisə yerindən 200-250 metr məsafədə heyvanların birləşərək canavara müqavimət göstərdiyinin şahidi olub. Canavar heyvanlarını qoruyan təsərrüfat sahibini görən kimi qaçıb.
Hücum nəticəsində 1 baş heyvan yaralanıb. Zərərçəkmişin sözlərinə görə, son 10 gündə canavarlar onun 4 inəyini parçalanıb. Ümumilikdə, Savalan Rəhimova 5000 manat maddi ziyan dəyib.
Təsərrüfat sahibləri bu hadisə ilə bağlı çox narahatdılar. Canavarların bu hadisəni yaşayış məntəqəsindən cəmi 2 km aralıda törətməsi kənd sakinlərini ciddi narahat edir.
Onlar canavarların insanlara hücum edə biləcəklərindən ehtiyat edirlər.
