AZXEBER.COM AzərTac-a istinadən xəbər verir ki, Rusiyanın Azərbaycanlı Gənclər Birliyinin (RAGB) sədri Leyla Əliyeva dekabrın 20-də Volqoqrad vilayətinin qubernatoru Sergey Bojenovla görüşündə bildirib ki, Azərbaycan Rusiya ilə dostluq əlaqələrini inkişaf etdirmək və möhkəmləndirmək üçün bundan sonra da mümkün olan hər şeyi etmək niyyətindədir.

Onun sözlərinə görə, Azərbaycanda böyük rus mədəniyyətini çox qiymətləndirirlər. Heydər Əliyev Fondunun vitse –prezidenti bildirmişdir ki, Rusiya ilə Azərbaycanı ümumi tarix bağlayır. Volqoqrad-Bakı Dostluq Parkının yenidən qurulmasının Heydər Əliyev Fondu tərəfindən maliyyələşdirilməsi ancaq ilk addımdır. Gələcəkdə maraqlı işlər hələ çox olacaqdır.

Leyla Əliyeva RAGB-nin Volqoqradda regional bölməsini açmaq və təcrübə mübadiləsinə başlamaq arzusu barədə məlumat verib.

Sergey Bojenov bildirib ki, Volqoqrad vilayətində 80 mindən çox azərbaycanlı yaşayır. İqtisadi və mədəni mübadilə ilə bərabər, ictimai və gənclər təşkilatları arasında təcrübə mübadiləsinin əhəmiyyətli olduğunu vurğulayan qubernator gələn il Bakıya işgüzar səfər etmək niyyətində olduğunu qeyd edib.

Görüş başa çatandan sonra Leyla Əliyevanın “Volqoqrad vilayəti qarşısında xidmətlərinə görə” medalı ilə təltif edilməsi mərasimi olub. Qubernator bildirib ki, Leyla Əliyeva geniş ictimai fəaliyyətinə görə bu medala layiq görülmüş ilk əcnəbi nümayəndədir.