Ermənistan öz məhsullarının ixracı ilə bağlı Avropa İttifaqına daxil olmağın nəticələrini qiymətləndirməlidir.
"Belta” xəbər verir ki, bu barədə Belarus Prezidenti Aleksandr Lukaşenko Ermənistanın Avropa İttifaqına inteqrasiyasının perspektivlərini şərh edərkən bildirib.
Lukaşenkonun fikrincə, İrəvan Aİ-yə qoşulmazdan əvvəl erməni konyakını, tərəvəz və meyvələrini hansı bazarlarda sata biləcəyini anlamalıdır.
O qeyd edib ki, Ermənistan ölkənin iqtisadi maraqları və milli məhsulların satış imkanları nəzərə alınmaqla gələcək xarici siyasət kursu barədə qərar qəbul etməlidir.
"Əgər Avropa İttifaqına qoşulmaq qərarına gəlmisinizsə, niyə tələsirsiniz? Əgər Fransanın sizin konyakınızı alacağına əminsinizsə, onda yaxşı, davam edin. Niyə tələsirsiniz?”, - Belarus dövlət başçısı qeyd edib.
Qeyd edək ki, Ermənistan 2025-ci ildə qanunvericiliklə Avropa İttifaqına daxil olma prosesinin başlandığını elan edib, lakin ölkə Aİ-yə üzv olmaq üçün rəsmi ərizə təqdim etməyib. Eyni zamanda, respublika Avrasiya İqtisadi İttifaqının üzvü olaraq qalır və fərqli gömrük və tənzimləmə qaydalarına görə eyni vaxtda həm Aİİ, həm də Aİ-yə tam üzvlük demək olar ki, mümkün deyil. Ermənistan parlamenti "Ermənistan Respublikasının Avropa İttifaqına daxil olması prosesinin başlanması haqqında" qanunu təsdiqləyib və Prezident Vaaqn Xaçaturyan bunu imzalayıb. Baş nazir Nikol Paşinyan qeyd edib ki, qanunun özü avtomatik olaraq üzvlük demək deyil, bunun üçün rəsmi ərizə, danışıqlar, Aİ ölkələrinin razılığı və Ermənistanda referendum tələb olunacaq.
