Baxıcı bildirib ki, o, Eldar Qasımov-Nigar Camal cütlüyünü uğurlu seçim hesab edir, amma səs imkanlarına görə onları üstələyən İlhamə Qasımovanın çıxışı isə onda təəssüf doğurub: "Mən ailə üzvlərimlə evdə müsabiqəni izləyirdim. Birdən qızlarımdan biri sual verdi ki, “mama, səncə kim gedəcək?” Mən artıq Eldarı görmüşdüm, amma onu tək görmürdüm. Eldarın yanında qız da görürdüm. Düzü İlhamə Qasımovanın çıxışı məni çaşdırdı. Amma fikrimcə, İlhamə “Eurovision” səhnəsi üçün deyildi. Onun çox gözəl səsi var. Finaldakı iştirakçıların içində ən gözəl səs İlhamənindir. Amma xarici görünüşü bu müsabiqədə iştirak etməyə imkan vermədi. Mən onun çıxışına baxanda, öz-özümə sual verdim ki, bəs bu ikinci nəfər kimdir görəsən? Amma seçilən Nigar Camalın həm xarici görünüşü, həm digər dilləri daha yaxşı bilməsi onun köməyinə çatdı. Ancaq etiraf etmək lazımdır, Nigarın səsi heç vaxt İlhamənin səsinə çata bilməz" - deyə Yeganə Zeynalova bildirdi.
Baxıcı özünün favorit iştirakçıları kimi 3 nəfəri - Eldar, Nigar və İlhaməni seçmişdi: “Hər üçü maraqlı idi. Eldara isə söz ola bilməz”.
Finalçıların istedadını yüksək dəyərləndirən baxıcı, Eldar Qasımovun parlaq gələcəyi olduğunu dedi: "Onlar ikisi də istedadlı və bacarıqlıdırlar. Amma Eldar Qasımovun həyatı boyunca daha çox uğurları olacaq. O, çox qabağa gedəcək. Nigarın da yaşıl işığı görünür. Amma o xanım nə vaxtsa səhnədən gedəcək".
Azərbaycan 7-14-cü yerlər arasında qərarlaşacaq?
Yeganə Zeynalova həmçinin hər kəsin maraqlandığı məqam - Azərbaycanın bu il neçənci yerə çıxması barəsində də açıqlama verdi: “Bu il Azərbaycanı 7-14 pillələr arasında görürəm. Amma bir məsələ də var, bu yarışmada sms böyük rol oynayır. Bəlkə kiminsə pulu çox oldu və o, küllü miqdarda vəsait yatırdı ki, Azərbaycan birinci yerə çıxsın. Mən bunu hələ ki bilmirəm. Ancaq bu günlük gördüyüm odur ki, Azərbaycan 7 - 14-cü yerlər arasındadır".
Baxıcı xanım digər finalçılar İlqarə və Aynişan haqqında da danışdı: "Məşhur müğənnilərimizin qızları öz analarının ayaqqabısını geyinsələr də, hələ anaları kimi yeriyə bilmirlər. Onların hələ ki sənətdə analarına çatmaqları mümkün deyil, tezdir".
//milli.az
