Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və Qlobal Sahibkarlıq Şəbəkəsi – Azərbaycan İctimai Birliyinin təşkilatçılığı ilə həyata keçirilən "Marketinq Mədəniyyətinin Təşviqi” layihəsi uğurla başa çatdı.
Layihənin məqsədi gənclər arasında marketinq savadlılığının artırılması, mədəniyyətin müxtəlif sahələrində effektiv tanıtım və kommunikasiya strategiyalarının öyrədilməsi, eləcə də iştirakçıların praktiki bilik və bacarıqlarının inkişaf etdirilməsi olmuşdur.
Layihənin açılış mərasimində çıxış edən layihə rəhbəri Zakir Quliyev, layihənin ümumi istiqamətlərindən, əhatə dairəsindən və gözlənilən nəticələrindən danışaraq, mədəniyyətin müasir yanaşmalarla təqdimatında marketinq alətlərinin rolunu vurğulamışdır.
Layihə çərçivəsində keçirilmiş təlimlər:
1-ci Təlim: Təhsildə Rəqəmsal Marketinq
Təlimçi: Tamella Mübarizli – Brainy School Tədris və Xarici Dillər üzrə İnkişaf Mərkəzinin təsisçi direktoru
İştirakçılar təhsil sektorunda rəqəmsal alətlərin tətbiqi, tələbə cəlbetmə mexanizmləri və kommunikasiya strategiyaları ilə tanış oldular.
2-ci Təlim: Günümüzdə Rəqəmsal Marketinqin Rolu və İşləmə Prinsipləri
Təlimçi: Urfan Ərəbli – Click Marketing şirkətinin təsisçisi, İqtisad və Xəzər Universitetlərinin müəllimi
Təlim zamanı rəqəmsal reklam alətləri, hədəf kütlənin müəyyənləşdirilməsi və kampaniyaların optimallaşdırılması məsələlərinə toxunuldu.
3-cü Təlim: Azərbaycan Biznes Mədəniyyəti
Təlimçi: Fəridə Abbasova – Azərbaycan Qadın Sahibkarlığının İnkişafı Assosiasiyasının marketinq departament rəhbəri, International Business Group-un təsisçi direktoru
Təlim çərçivəsində işgüzar etika, yerli biznes yanaşmaları və korporativ mədəniyyət mövzularında interaktiv müzakirələr keçirildi.
4-cü Təlim: Sahibkarlığın Əsasları və Uğurlu Biznesin Sirləri
Təlimçi: Şəfa Paşayeva – Business Trainers, ILO-nun TÖT təlimçisi, Biznes İnkişaf Meneceri
İştirakçılar uğurlu sahibkarlıq üçün tələb olunan strateji düşüncə, satış və idarəetmə bacarıqları barədə praktiki məlumat əldə etdilər.
5-ci Təlim: Mətbuat və İctimaiyyətlə Əlaqələrin Marketinqdə Rolu
Təlimçi: Fatimə Quliyeva – Azərbaycan Respublikası Gənclər Təşkilatları Milli Şurasının Mətbuat Katibi
Mətbuatla effektiv əməkdaşlıq, ictimaiyyətlə əlaqələr, reputasiya idarəçiliyi və PR kampaniyalarının qurulması mövzuları müzakirə olundu.
6-cı Təlim: Marketinq Planının Hazırlanması
Təlimçi: Fəxri Məhəmmədzadə – Təlimçi, ekspert, ADMİU-da MBA üzrə müəllim
Bu təlimdə iştirakçılar praktik qrup işlərinə cəlb olunaraq real və simulyasiya olunmuş layihələr üçün marketinq planları hazırladılar
Yekun mərhələ – 7-ci Təlim: Marketinq Planlarının Təqdimatı
Layihənin sonuncu – 7-ci təlimində iştirakçılar tərəfindən hazırlanan marketinq planları təqdim olundu. Təlimçi Fəxri Məhəmmədzadənin rəhbərliyi ilə iştirakçılar 5 qrupa bölünərək aşağıdakı sahələr üzrə planlar hazırladılar:
1️. Elm və Təhsil Sahəsi
Mövzu: Mərkəzi Elmi Kitabxananın marketinq planı
Fokus: Akademik əməkdaşlıqlar, tələbələrin və tədqiqatçıların cəlbi, rəqəmsal xidmətlərin tanıdılması
2️. Brend və Təbii Kosmetika
Mövzu: "Made in Azerbaijan” təbii kosmetik məhsulları üçün marketinq planı
Fokus: Hədəf bazar seçimi, satış strategiyası, rəqəmsal reklam və brendləşdirmə
3. Qida Sənayesi
Mövzu: Sağlam qidalanma yönümlü mobil food truck üçün marketinq planı
Fokus: Brend mövqeləndirməsi, sosial media kampaniyası və məhsul tanıdımı
4. Sosial Təşəbbüs / QHT
Mövzu: Gənclər üçün maliyyə savadlılığı üzrə sosial təşəbbüs
Fokus: Tərəfdaşlıqlar, PR strategiyaları və sosial təsirin artırılması
5. Turizm və Regional İnkişaf
Mövzu: Sabirabadda kənd turizmi layihəsinin tanıdılması
Fokus: Yerli resurslardan istifadə, regionun təqdimatı, turist cəlbi və satış strategiyaları
Hazırlanan planlar peşəkar təlimçilər tərəfindən qiymətləndirildi və iştirakçılara ətraflı rəy bildirildi. Qrup işi, təqdimat bacarığı və analitik yanaşma layihənin əsas uğur elementlərindən biri kimi dəyərləndirildi.
Nəticə və Perspektivlər
"Marketinq Mədəniyyətinin Təşviqi” layihəsi gənclər, yeni nəsil sahibkarlar və marketinq həvəskarları üçün müasir və praktik bir platforma yaratmaqla, onların inkişafına töhfə verdi. İştirakçılar yalnız nəzəri biliklər deyil, real iş təcrübəsinə bərabər bacarıqlar əldə etdilər.
Layihə rəhbəri Zakir Quliyev bağlanış çıxışında qeyd etdi ki, layihənin nəticələri gözləniləndən də yüksək olmuş, iştirakçılar özlərini real marketinq peşəkarı kimi sınamaq imkanı qazanmışlar. Gələcəkdə bu layihənin genişləndirilməsi və daha çox regionda tətbiqi planlaşdırılır.
Qeyd: "Marketinq Mədəniyyətinin Təşviqi” layihəsi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Qlobal Sahibkarlıq Şəbəkəsi – Azərbaycan İctimai Birliyi tərəfindən həyata keçirilmişdir.
