23–25 iyul tarixlərində Marsol Group-un təşkilatçılığı ilə sahibkarların iştirakı ilə həyata keçirilən işgüzar Naxçıvan səfəri uğurla başa çatıb.
AZXEBER.COM xəbər verir ki, üç gün davam edən səfər çərçivəsində sahibkarlar arasında işgüzar əlaqələrin genişləndirilməsi, yeni əməkdaşlıq imkanlarının müzakirəsi və Naxçıvanın iqtisadi potensialının yaxından tanıdılması məqsədilə bir sıra görüşlər və istehsalat ziyarətləri təşkil olunub.
Səfər proqramı çərçivəsində Marsol Group partnyorları Naxçıvanda fəaliyyət göstərən APF Şirkətlər Qrupunun müəssisələrini, CAHAN Sənaye Kompleksini və ENNA MMC-ni ziyarət edərək müəssisələrin fəaliyyəti, istehsal prosesləri və gələcək inkişaf planları ilə tanış olublar.
Həmçinin Naxçıvan Muxtar Respublikası İqtisadiyyat Nazirliyində keçirilən görüşdə sahibkarlar regionda həyata keçirilən iqtisadi islahatlar, dövlət dəstəyi mexanizmləri, vergi və gömrük güzəştləri, eləcə də investisiya imkanları barədə ətraflı məlumat əldə ediblər. Görüş zamanı qarşılıqlı əməkdaşlıq perspektivləri ətrafında fikir mübadiləsi aparılıb.
Səfər çərçivəsində təşkil olunan işgüzar görüş və axşam ziyafətində iştirakçılar öz fəaliyyətlərini təqdim edərək yeni əməkdaşlıq imkanlarını müzakirə edib, sahibkarlar arasında əlaqələrin möhkəmləndirilməsi istiqamətində məhsuldar müzakirələr aparıblar.
İşgüzar səfər dövlət və özəl sektor arasında əməkdaşlığın inkişafına, sahibkarlar arasında təcrübə mübadiləsinin genişlənməsinə və Naxçıvanın investisiya və biznes imkanlarının tanıdılmasına töhfə verib.
