Fransada nəşr edilən həftəlik satirik jurnal olan "Charlie Hebdo" yenidən müsəlman dünyasını çalxalayacaq. Belə ki, jurnalın bu gün satışa çıxacaq yeni sayında Məhəmməd peyğəmbər (s.ə.s) karikaturası yer alacaq. Bu barədə məlumatı jurnalın baş redaktoru Stefan Şarbone bildirib.
Peyğəmbərin karikaturası jurnalın üz qabığında deyil, içərisində və son səhifədə olacaq. Jurnalın saytında qeyd edilib ki, karikaturalar "Fundamentalizm" rubrikasında "Məhəmməd kino çəkir" başlığı altındadır.
Fransa jurnalındakı karikaturalar müsəlman aləmində böyük qalmaqala səbəb olan "İslamın məsumiyyəti" filminə həsr edilib. Adıçəkilən film müsəlman ölkələrində böyük qarşıdurmalara səbəb olub. Hətta ABŞ-ın Benqazidəki səfirliyinə hücum nəticəsində bu ölkənin Liviyadakı səfiri və daha 3 nəfər öldürülüb.
Redaktorun sözlərinə görə, bu şəkillər jurnalın başqa karikaturlarından bir qədər az təxribatlıdır. "Mətbuatın söz azadlığı - bu təxribatdır?".
Fransanın baş naziri Jan Mark Eyro bildirib ki, Fransa dünyəvi dövlətdir. Onun əsas fundamental prinsiplərindən biri fikir azadlığı hüququnun qorunmasıdır.
Paris məscidinin rektoru Dalil Bubaker karikaturlarla bağlı narahatlığını və təssüfünü bildirib. O, qeyd edib ki, bu şəkillər müsəlman dünyasındakı narazılıqları dahada artıracaq.
Qeyd edək ki, "Charlie Hebdo" ilk dəfə deyil ki, Məhəmməd peyğəmbər (s.ə.s) karikaturlarını dərc edir. Oxşar şəkillər 2006-2011-ci ildə də nəşr edilib. Bu zaman jurnalın saytı dağıdılmış, jurnalistlərin ünvanına çox saylı tənqid, hədələr gəlmişdi.
