Xəbər verdiyimiz kimi, tiktoker İlduzə Hacıyevanın (Arzum) növbəti apellyasiya məhkəməsi keçirilib.
Məhkəmə zamanı blogerin vəkillərinin təkrar ekspertiza təyin edilməsi istəyi təmin olunub. Məhkəmə qeyri-müəyyən vaxta təyin edilib.
Məhkəmədə qəza zamanı avtomobildə olan Sənubər Muradova da iştirak edib. O, ifadə verib.
"Arzum"un vəkili Fərid Həsənov bu haqda danışaraq "Sənubər xanım ifadə verdi. Qəza zamanı yadında qalanları danışdı" sözlərini söyləyib.
Vəkil əlavə edib ki, qəzada dünyasını dəyişən Amal Məlikovun ailəsi ilə rəsmi barışıq olmasa da tərəflər bununla bağlı danışıqlar aparır:
"Barışıqla bağlı cəhdlərimiz var. İlduzə xanımın təqsirli olub, olmamasından asılı olmayaraq barışığa çalışılır. Danışıqlar aparılır, zərərin bir qisminin ödənilməsi üçün razılıq əldə etməyə çalışırıq".
Qeyd edək ki, "Arzum"un təqsirli bilindiyi qəza ötən ilin iyununda Mərdəkan qəsəbəsində olub. Gecə yarısı "Changan” markalı avtomobili idarə edən "Arzum" sola dönmə manevri edərkən arxadan gələn "Mercedes”lə yandan toqquşub. Nəticədə "Mercedes” idarəetmədən çıxaraq maneəyə çırpılıb və bir neçə dəfə aşıb. Qəza nəticəsində avtomobilin sürücüsü- 29 yaşlı Amal Məlikov hadisə yerində ölüb, həyat yoldaşı Sənubər Muradova isə ağır xəsarət alıb.
Açılan cinayət işinə əsasən, İ.Hacıyeva 5 il 2 ay müddətinə azadlıqdan məhrum edilib. Hökm elan edildikdən dərhal sonra o, məhkəmə zalında həbs olunaraq cəzasını çəkmək üçün ümumi rejimli cəzaçəkmə müəssisəsinə göndərilib.
Bir neçə gün əvvəl isə apellyasiya məhkəməsi keçirilib və tiktoker ev dustaqlığına buraxılıb.
///axsam.az
