Sosial şəbəkələrdə "Vielleicht Vielleicht” trendi ilə məşhurlaşan alman blogerlər Mayk Mikolazçik və Yanik Hill Daşkənddə saxlanılıb.
AZXEBER.COM xarici mətbuata istinadən xəbər verir ki, məlumata görə, blogerlər paytaxtdakı hotellərdən birində pərəstişkarları üçün tədbir təşkil etməyi planlaşdırıblar. Lakin görüş başlamazdan öncə onlar hüquq-mühafizə orqanlarının əməkdaşları tərəfindən saxlanılıblar.
Hadisə yerinə toplaşan çoxsaylı fanatlar bir neçə saat ərzində blogerləri gözləməli olublar. Şahidlərin sözlərinə görə, hüquq-mühafizə orqanları gənclərlə profilaktik söhbət aparıb.
Qeyd edək ki, Mayk Mikolazçik və Yanik Hill bu ilin əvvəlindən etibarən rusdilli musiqilər fonunda çəkdikləri videolar və rəqs məzmunları ilə MDB ölkələrində geniş populyarlıq qazanıblar. Onlar yay aylarında Qırğızıstan, Qazaxıstan və Özbəkistanı əhatə edən turneyə çıxıblar.
Blogerlər hadisə ilə bağlı hələlik rəsmi açıqlama verməyiblər. Yerli mənbələrin iddiasına görə, kütləvi toplaşmalarla bağlı təhlükəsizlik tədbirləri səbəbindən görüşün keçirilməsi ilə bağlı müəyyən məhdudiyyətlər tətbiq olunub.
Aysel
