Həyatını itirən məşhur müğənni və aktyor Özkan Uğur üçün Atatürk Mədəniyyət Mərkəzində mərasim keçirilib.
AZXEBER.COM Türkiyə mediasına istinadən xəbər verir ki, keçirilən vida mərasimə sənətçilər qatılarkən, müğənninin gitarası onun tabutunun üzərinə qoyulub.
Mərasimdə mədəniyyət və turizm naziri Mehmet Nuri Ersoy, İstanbul Böyükşəhər Bələdiyyəsinin sədri Əkrəm İmamoğlu, aktyor və aktrisalar Zəfər Alagöz, Çağla Şikel, Yılmaz Ərdoğan, Ozan Güvən, Cem Yılmaz və bir çox sənətçi iştirak edib Mərasimdə Özkan Uğur haqqında film də nümayiş olunub. Zalda sənətçilərin göz yaşlarını saxlaya bilmədiyi gözdən qaçmayıb. Uğurla bağlı video-təqdimatdan sonra hamı ayağa qalxaraq alqışlasa da, Cem Yılmaz oturduğu yerdə ağlayaraq çətin anlar yaşayıb.
Uğur kimi sənətçilərlə vidalaşmağın çətin olduğunu deyən nazir Ərsoy, "O, həm musiqi əfsanəsi, həm də ekranlarda ən təbii personajlardan biridir. O, örnək olacaq çox dəyərli bir istedad idi. Təəssüf ki, belə dəyərli sənətkarların yerini doldurmaq çox çətindir. Bütün sənətçilərimizə, yaxın dostlarımıza, xüsusilə onların dəyərli ailələrinə səbr diləyirəm. Hamımıza başsağlığı verirəm", - deyə kədərli fikirlər söyləyib.
Anası ilə səhnəyə çıxan Alişan Uğur atası ilə vidalaşaraq öz fikirlərini bölüşüb:
"Özkan Uğur 41 illik anamın sevgilisi, onun ömür-gün yoldaşı və sevimli atamdır. Üç nəfərlik ailəmizin təməli idi. Bəzən əsəbiləşərdik, amma sözlə ifadə edə bilməyəcək qədər çox sevirdik bir-birimizi. Atam nadir insanlardan idi. Hər kəsin bir-biri ilə yaxşı olmasını istəyirdi. Özünəməxsus musiqisi, improvizasiyası, mükəmməl aktyorluğu ilə qəlblərdə taxt-tac qurdu. Xəstəliyinin ən çətin anlarında belə gülümsəməsi həmişə üzündə idi. Onun ailəsi olaraq dərin hüznümüzü ifadə etmək üçün sözlər yetərli deyil. Zaman bizim üçün dayandı. Siz hər zaman bizimlə olacaqsınız”.
Qeyd edək ki, Özkan Uğur Taksim məscidində qılınacaq cənazə namazından sonra Karacaahmet qəbiristanlığında torpağa tapşırılacaq.
Mikayıl
