Türkiyənin İzmir şəhərində mütəşəkkil cinayətkarlığa qarşı keçirilən genişmiqyaslı əməliyyat çərçivəsində Şimali Kipr Türk Cümhuriyyətinin paytaxtı Lefkoşada həbs olunan məşhur müğənni Halük Ləvənt hakim qarşısına çıxarılıb. Türkiyəli müğənni Lefkoşa Qəza Məhkəməsinə əlləri qandallı gətirilməsinə etirazını bildirib. «Bu qanuna ziddir. Burada 15 min şübhəli şəxs olduğu halda, təkcə mənim üzərimdə diqqətin mərkəzləşməsi məni utandırır. Müstəntiqdən icazə aldığım halda, telekanallara zəng edib «gələcəyəm» dediyim halda, bütün konsert proqramlarım təxirə salınıb, başqaları qandalsız gətirilərkən, mən qandallı halda gətirilirəm. Ölkəmə görə utanıram. Üstümdə heç bir günah yoxdur. Sadəcə istintaqa görə bu vəziyyətə salınmağım qanuna ziddir.» - deyə, Halük Ləvənt bildirib.
Məhkəmə Halük Ləvəntin Türkiyəyə ekstradisiyası qərarı verib. Məşhur müğənni ekstradisiya ilə bağlı əməliyyatlar yerinə yetirilənədək 30 gün ərzində Lefkoşa Mərkəzi Həbsxanasında saxlanılacaq. Məhkəmədən çıxarkən mətbuat nümayəndələrinin suallarını cavablandıran Halük Ləvənt məhkəmənin qərarını «insan haqlarına zidd» adlandırıb. Müğənninin avtomobilə minərkən mahnı zümzümə etməsi də diqqəti çəkib.
