Ailə, Qadın və Uşaq Problemləri üzrə Dövlət Komitəsi qızların nikah yaşının 18-ə qaldırılması ilə bağlı Milli Məclisə təkliflər hazırlayır. Bəzi millət vəkilləri, qadın təşkilatları buna tərəfdardır. MM Sosial siyasət komitəsinin sədr müavini Musa Quliyev isə Ailə Məcəlləsində nikah yaşının qaldırılmasının əleyhinədir.
Deputat bildirdi ki, məclisdə belə təklif irəli sürülərsə, onun əleyhinə çıxış edəcək. Onun fikrincə, ilk növbədə bunu törədən səbəbləri aradan qaldırılmalıdır: “Çünki nəticə ilə mübarizə apararaq nikah yaşını qaldırsaq, dərhal qeyri-rəsmi nikahların sayı artacaq”.
Hazırkı qanunvericilik 17 və istisna hallarda 16 yaşda nikaha icazə verir. Bununla belə, bu yaşda da qeyri-rəsmi nikahların, erkən nikahların sayı artır: “Nikah yaşını 18-ə qaldırsaq nə olacaq? Deməli, özümüz bilərəkdən qeyri-rəsmi nikahların artmasına rəvac vermiş olacağıq”.
Deputat erkən nikahların səbəblərini axtarmağı və aradan qaldırmağı daha önəmli sayır. Onun fikrincə, erkən nikahlar sosial, ənənə və mədəni fərqlilik səbəblərindən ortaya çıxır. Təbii ki, buraya təhsil almaq, peşə qazanmaq kimi hallarda yaranan problemlər də daxildir. Əksər bölgələrdə bu məsələdə sosial və ənənəvi səbəblər daha çox üstünlük təşkil edir. M.Quliyev hesab edir ki, bu stereotipi qırmaq üçün müvafiq orqanlar hərəkətə keçməlidir. İlk növbədə orta məktəblərdə yuxarı siniflərdə qızların ərə getməsi faktlarına qarşı hüquqi mübarizə gücləndirilməlidir: “Xüsusilə cənub bölgəsindən bu faktla bağlı xəbərlər daha çox gəlir. Orada orta məktəblərdə 9-cu sinifdən yuxarı, ümumiyyətlə, qızlara rast gəlinmir, əksəriyyəti ərdə olur. Ya da məktəbə getməyib, oturub evdə gözləyirlər ki, nə vaxt ərə gedəcəklər. Yəni birinci olaraq təhsil işçiləri çalışmalıdırlar ki, orta məktəbdən bu cür kobud yayınmanın qarşısı alınsın”.
Bundan başqa, orta məktəbdə oxuyan qıza, onun valideynlərinə məktəbi bitirdikdən sonra hansısa peşə ilə məşğul ola biləcəyi bildirilməlidir. Sözsüz ki, məzunların işlə təmin olunma problemi də aktualdır. Deputat deyir: “Mövcud stereotipi qırmayınca, nə qədər qanun dəyişsək də, bu problem həll olmayacaq”.
“Ayna” qəzeti
