Politoloq Milli Şuranın seçkilərə qədər dağılmasının qaçılmaz olacağını deyir.
Milli Şurada baş verən son prosesləri Gün.Az-a şərh edən politoloq Cümşüd Nuriyev orada bir araya gələn partiyaların birliyi üçün zəmin qalmadığı qənaətindədir:“Milli Şura yaradılanda da demişdim ki, bu, perspektivsiz bir qurumdur. Mənim bu fikrim onların mövqeyini qəbul etməməyimlə bağlı deyildi.Mən Milli Şuranı yaradan təşkilatların qarşılıqlı münasibətlərini, hakimiyyətə yanaşmalarını və beynəlxalq əlaqələrini nəzərə alaraq o fikri irəli sürürdüm.Milli Şurada baş verənlər də göstərir ki, oradakıların hər biri öz marağını bu və ya başqa formada təmin etmək üçün bir araya gəliblər.Amma Rüstəm İbrahimbəyovun namizədliyinin aradan qalxmasından sonra “El” hərəkatı, Açıq Cəmiyyət. Liberal və Klassik Xalq Cəbhəsi partiyalarında ciddi narazılıqlar yarandı.Xüsusilə, Eldar Namazovun “El” hərəkatı bu vəziyyətlə barışmaq istəmir və narazılığını da açıq şəkildə bildirirdi. Namazovun özü danışmasa da, ətrafındakı “uzaqvurmayan toplar” Milli Şura əleyhinə bəyanat verirlər.Namazovun müavinlərindən birinin Cəmil Həsənliyə yox, İlqar Məmmədova dəstək verilməsinin vacibliyini bəyan etməsi əslində “El”in mövqeyini göstərir.O cümlədən, ACP, ALP və KXCP də Milli Şurada üzləşdikləri münasibətə görə əsəbi gərginlik içindədirlər. Bu partiyaların nümayəndələri də öz iradlarını gizlətmirlər.Onların arasında “El” hərəkatı Milli Şuradakı mövqeyini bərpa etməyə çalışır. Amma oradan istefa vermiş Əflan İbrahimovun açıqlamasından sonra başlanmış dindirmə prosesi onların işini çətinə salıb.Bilmirlər ki, Milli Şuraya təsir imkanlarını artırmaq üçün mübarizə aparsınlar, yoxsa prokurorluqla o məsələni yoluna qoysunlar. Eyni zamanda, Milli Şura da artıq AXCP ilə Müsavatın poliqonu durumuna gəlib.Artıq Milli Şurada elə bir etimadsızlıq mühiti yaranıb ki, onların bir arada olmaları mümkün deyil. Ona görə də mən şübhə etmirəm ki, Milli Şura seçkilərə qədər dağılacaq.Ən azı “El” hərəkatı ilə adlarını çəkdiyim partiyalar oranı tərk edəcəklər. Onların getməsi isə Milli Şuranın Müsavatla AXCP arasında nüfuz müharibəsi meydanına dönmüş İctimai Palataya çevrilməsi deməkdir”.
