"Qala BTX" MMC, "General" MMC və "Azər Mühafizə" adlı özəl mühafizə şirkətlərinin həbsdə olan direktoru Vüqar Hüseynova qarşı dələduzluq edilib.
Bu barədə report-a V.Hüseynovun vəkili Feyzulla Mehdiyev məlumat verib.
Vəkilin sözlərinə görə, dələduzluq və mənimsəmədə təqsirləndirilən müvəkkilinin işinə Bakı Ağır Cinayətlər Məhkəməsində baxılır. O bildirib ki, İsif Azayev adlı şəxs V.Hüseynova qarşı dələduzluq edib. Faktla bağlı Bakı Şəhər Baş Polis İdarəsində cinayət işi başlanılıb:
"Müvəkkilim Vüqar Hüseynov təcridxanda saxlanılan zaman orada onunla birlikdə eyni kamerada qalan Fərid Azayevlə, sonra isə Fərid Azayevin vasitəsi ilə atası İsif Azayevlə tanış olub. İsif Azayev ona deyib ki, pul qarşılığında müvəkkilimin hazırda həbsdə olan həyat yoldaşı Nəzakət Aşurbəyovanı ev dustaqlığına çıxarmaq imkanına malikdir. Bu işi həll edəndən sonra gələcəkdə Vüqar Hüseynovun da azadlığa çıxmasında köməklik göstərəcəyinə söz verib. O, Vüqar Hüseynovdan əvvəl 49 min, sonra 30 min manat pul istəyib. Bir qədər sonra hüquqlarını müdafiə etdiyim şəxs İsif Azayevə 23 min manat pul verib. İsif Azayev isə ona bildirib ki, guya 17 min manatı da tanıdığı şəxsə özü verəcək".
Vəkil qeyd edib ki, İ.Azayev V.Hüseynova verdiyi vədə əməl etməyib: "İsif Azayev 23 min manat pulu alandan sonra heç bir iş görmədi. Bundan sonra Vüqar Hüseynov həmin pulu geri istədi. Lakin İsif Azayev hissə-hissə müvəkkilimə 9 min manat pul qaytarıb. Qalan 14 min manatı isə hələ də verməyib. Bununla bağlı hüquq-mühafizə orqanlarına müraciət etdik və faktla bağlı cinayət işi başlanılıb. Həmçinin Baş Prokurorluğa, Daxili İşlər Nazirliyinə də şikayətlər vermişik".
Qeyd edək ki, "Qala BTX" MMC, "General" MMC və "Azər Mühafizə" adlı özəl mühafizə şirkətlərinin həbsdə olan direktoru Vüqar Hüseynov, onun həyat yoldaşı Nəzakət Aşurbəyova və digər 36 nəfər dələduzluq, mənimsəmə, rüşvət alma və bir neçə maddə ilə təqsirləndirilirlər. Hazırda cinayət işinə Bakı Ağır Cinayətlər Məhkəməsində, hakim Faiq Qəninevin sədrliyi ilə baxılır. Ümumilikdə iş üzrə 5200 nəfər zərərçəkmiş var.
İ.Azayevin iki oğlu - Baş Dövlət Yol Polisi İdarəsinin keçmiş əməkdaşı Fərid Azayev, Faiq Azayev və Vüsal Babayevlə Sona Kərimova adam oğurluğu və digər maddələrlə təqsirli bilinib. Fevralın 21-də Bakı Ağır Cinayətlər Məhkəməsində, hakim Faiq Qəninevin sədrliyi ilə keçirilən prosesdə hökm oxunub. Məhkəmənin hökmü ilə Fərid Azayev 10 il 6 ay, Vüsal Babayev 9 il müddətinə azadlıqdan məhrum ediliblər. Faiq Azayev 5 il 6 ay müddətinə azadlıqdan məhrum edilib və onun barəsində polisin nəzarətinə verilmə qətimkan tədbiri həbs qətimkan tədbiri ilə əvəz olunub və o, məhkəmə zalında həbs olunub. Sona Kərimova barəsində isə 2700 manatlıq cərimə cəzası kəsilib.
