Müsavatçı gənclərin sosial şəbəkələrdə yaydığı Eldar Namazovun müxalifəti pula satdığı təsvir edilən video ilə bağlı bir gün sonra Müsavat Gənclər Təşkilatı münasibət açıqlayıb.

AZXEBER.COM-a müsahibəsində Müsavat Gənclər Təşkilatının sədri Tural Abbaslı sosial şəbəkələrdə sürətlə yayılan bu videonun təmsil etdiyi təşkilat tərəfindən yayılmasını təkzib edib: “Bizim partiyanın gənclər təşkilatının bu video ilə heç bir əlaqəsi yoxdur. Bu təxribatdır”.

Xatırladaq ki, videoda son vaxtlar müxalifət düşərgəsinə “satqın”çılıqda günahlandırılan Rauf Arifoğlunun da tənqid olunması belə ehtimallara yol açır ki, bu, Müsavat daxilində hansısa narazı qrup tərəfindən hazırlanmış videodur. Bir müddət əvvəl Müsavat Partiyasının Gənclər Təşkilatına sədr seçkiləri də böyük skandalla müşayiət olunub və hələ də yeni sədr müəyyən olunmayıb.

Bu videonun həmin nəticələrdən narazı qalan müxalifətçi gənclər tərəfindən yayılması ehtimalı yüksək qiymətləndirilirdi. Tural Abbaslı bu ehtimallara da münasibət bildirib, o, Gənclər Təşkilatına sədr seçkiləri zamanı baş verən narazılıqların demokratik qaydada həll edildiyini söyləyib: “Gənclər Təşkilatında sədr seçkilərində narazılıqlar olmuşdu. Elə namizəd var idi ki, onun adı siyahıya düşmüşdü, bəzilərinki düşməmişdi. Ancaq bütün problemlər şəffaf şəkildə öz həllini tapdı”.

T.Abbaslı videonun kimlər tərəfindən hazırlandığını açıqlamasa da, AXCP Gənclər Təşkilatına da işarə vurub. Sosial şəbəkələrdə AXCP Gənclər Təşkilatı üzvlərinin Müsavat Partiyası ətrafında ajiotaj yaratmaq istəyindən bəhs edib: “Müsavat Gənclər təşkilatı ətrafında o zaman ajiotaj yaratmaq mümkün olardı ki, Müsavat Partiyasının içərisində müəyyən boşluqlar mövcud olsun. Buna görə partiyanın nüfuzuna xələl gətirmək mümkün olardı. Müsavat Partiyasının nizamnaməsinə görə hansısa bir narazılıq varsa, seçki yenidən keçirilə bilər. Partiya kiminsə fikrinə görə yox, öz nizamnaməsinə uyğun fəaliyyət göstərir və atdığı bütün addımları buna görə tənzimləyir”.

Qeyd edək ki, ötən gün yayılmış məlumatlarda bu videodan sonra müxalifətçi gənclər arasında əlbəyaxa dava da düşdüyü də deyilirdi. Hətta davaya partiya sədrləri təhqir olunduğu üçün AXCP Gənclər Təşkilatının fəallarının da qoşulduğu bildirilirdi. Tural Abbaslı bunları təkzib etsə də, hələlik AXCP Gənclər Təşkilatı yayılmış məlumatları nə təsdiq, nə də təkzib etməyib.

Azər Niftiyev, AZXEBER.COM