Şahin Mustafayevin sözlərinə görə, məqsəd qeyri-neft sektorunun ÜDM-dəki payını 80 faizə çatdırmaqdır
“Növbəti 10 ildə Azərbaycanın qarşısında duran əsas vəzifə qeyri-neft sektorunun inkişafı hesabına Ümumi Daxili Məhsulun (ÜDM) iki dəfə artırmaq, qeyri-neft sektorunun ÜDM-də xüsusi çəkisini 80 faizə çatdırmaqdır”. ANS PRESS-in məlumatına görə, bunu iqtisadi inkişaf naziri Şahin Mustafayev “Azərbaycan” qəzetinə müsahibəsində bildirib. Onun sözlərinə görə, bu məqsədlə innovativ inkişafın hərtərəfli stimullaşdırılması, sənayeləşmə siyasətinin davam etdirilməsi, sənaye zonalarının yaradılması, müasir texnologiyalar əsasında rəqabət qabiliyyətli və ixracyönümlü məhsul istehsalının artırılması, aqrar sektorda intensiv metodların tətbiqinin genişləndirilməsi kimi tədbirlər həyata keçirilməklə, Azərbaycan iqtisadiyyatının mümkün qədər qısa vaxt ərzində modernləşməsi ön plana çıxıb. Nazir qeyd edib ki, bu mərhələnin səciyyəvi xüsusiyyəti əvvəlki illərdə möhkəm təməli qoyulmuş yeni iqtisadi artım amillərinin iqtisadi fəallığa daha geniş miqyasda cəlb edilməsidir: “Başqa sözlə, ölkə iqtisadiyyatının modernləşdirilməsi və ya innovativ inkişaf mərhələsinə uyğun tədbirlərin həyata keçirilməsi davamlı iqtisadi artımın təmin edilməsinə, mövcud olan və gələcəkdə gözlənilən iqtisadi və sosial çağırışlara adekvat cavab verilməsinə şərait yaradacaq. Azərbaycanın innovativ inkişafı, ilk növbədə, Azərbaycan şirkətlərinin müasir texnologiyaları mənimsəməsi, rəqabətqabiliyyətli yeni məhsulların istehsalının təmin edilməsi və ixrac bazarlarının genişləndirilməsidir”. Ş. Mustafayev qeyd edib ki, müasir texnologiyaların tətbiqi ilə sənayedə yeni məhsul istehsalı 2007-ci illə müqayisədə 2010-cu ildə 5 dəfəyə yaxın artıb.
