“Rusiya bizi gücnən Gömrük İttifaqına salıb suverenliyimizi əlimizdən almaq istəyir”.
Bu sözləri AZXEBER.COM-a açıqlamasında politoloq Vəfa Quluzadə Azərbaycan və Ermənistan prezidentlərinin Soçidə keçiriləcək görüşünü şərh edərkən söyləyib.
O, bu görüşdən sonra Azərbaycanın işğal altında olan 5 rayonunun geri qaytarılması ehtimalı ilə bağlı cəmiyyətdə səslənən fikirlərə münasibət bildirərək, bu fikirlərin əsassız olduğunu deyib:
“Nə bizə beş rayon verəcəklər, nə də başqa bir şey. Rusiya bizi güclə Gömrük İttifaqına salıb suverenliyimizi əlimizdən almaq istəyir. Beləcə Azərbaycandan umduqlarını alıb onu özündən asılı vəziyyətə salmağı düşünür. Rusiya çalışır ki, Azərbaycan böyük itkilər versin və beləcə, Soçidə Azərbaycanı ələ almaq daha da asanlaşsın. Rusiya istəyirdi ki, iki ölkə arasında irimiqyaslı müharibə başlasın və regionda böyük bir ölkənin rəhbəri kimi, Putin sülhün təminatçısı rolunda çıxış etsin. Bəziləri bəyan edir ki, Azərbaycan və Ermənistan Gömrük İttifaqına qoşulsa, Rusiya Ermənistanın, Qazaxıstan da Azərbaycanın qarantı olacaq və bir daha atəşkəs pozulmayacaq. Hər şey göz qabağındadır: Rusiya öz geosiyasi maraqları uğrunda döyüşə başlayıb. Krımın işğalı, Ukraynanın şərqindəki hadisələr də bu qəbildəndir”.
Xatırladaq ki, Azərbaycan və Ermənistan prezidentlərinin avqustun 8-də və 9-da Soçidə görüşü keçiriləcək.
