Oksana xanım, son baş verənlər sizdə Azərbaycan jurnalistikası haqqında hansı təəssürat yaratdı?
- Hamını demək düzgün olmaz, amma bəzi jurnalistlər var ki, tez-tez öz iş yerlərini dəyişərək, nəinki keçmiş şirkətinə qarşı, hətta müəyyən mövzulara qarşı da qərəzli mövqedən çıxış edirlər. Axtarsan, heç jurnalist də deyillər! Ixtisasları Allah bilir nədir!
Sizcə jurnalistikanın verdiyi imkanlar insanları təhqir etməyə əsas verirmi? Siz jurnalist olsaydınız bu məsələdə necə mövqe tutardınız?
- Onlar elə bilirlər ki, kiminsə iftirasını , qisasını işıqlandıraraq məsuliyyəti öz üzərlərindən atmış olurlar. Ancaq birtərəfli, araşdırılmamış məlumatı efirə vermək – bu ən böyük qeyri-peşəkarlıqdır!!!
Hər gün bu ölkədə neçə-neçə tanınmış evlənir, boşanır, bu qədər səs-küyə səbəb olmur. Bu gün efirdə, mətbuat səhifələrində sizin boşanmanızdan vacib məsələlərə niyə yer ayrılmır?
- Məni də o təəccübləndirir ki, mühüm, siyasi, vacib xəbərlərdən sonra mənim həyatım haqqında danışırlar. Bu ya onların reytinq qazanmaq naminə olunur, ya da, ANS-in Elşadla olan çoxdankı şəxsi münaqişələrinə görə məni “vurmaq” istəyirlər.
Sizə qarşı baş verənlərlə bağlı məhkəməyə müraciət etmək istəyinizi ifadə etmişdiniz. Sizcə ictimai fikir bu baş verənlərə necə münasibət bəsləyir? Qonşular, qohumlar sizi dəstəkləyirmi?
- Sözsüz ki, nəinki məni şəxsən tanıyanlar, hətta məni ancaq ekranda görənlər məni dəstəkləyir. Bircə səhvim o oldu ki, vaxtında özüm her şeyi açıqlamadım. Bunun səbəblərini artıq bilirsiz! Məhkəməyə isə kanalı yox, “ərimi” verecem. “Qərəzsiz, dəqiq, vicdanlı” devizi ile çalışan kanalın qərəzli və vicdandan kənar çıxış etməsi üçün ən yaxşı məhkəmə ele xalq özüdür!
Azərbaycan telekanallarını, Azərbaycan mətbuatını necə, hansı səviyyədə görmək istərdiniz?
- Bizim arzularımızla onsuz da heç nə düzəlmir! Əyləncəli kanalın öz yeri, informasiya kanalının öz yeri olmalıdır. Bunları qarışdırmaq olmaz.
22 İyul Milli Mətbuat günüdür. Bu bayram ərəfəsində jurnalistlərə ürək sözlərinizi bilmək istərdik.
- Jurnalistlər sırasında çoxlu dostlarımız olmağına baxmayaraq, onlar həmişə mənim haqqımda ədalətli yazıblar. Mən heç vaxt tənqiddən qorxan olmamışam. Sadəcə belə qeyri-peşəkar jurnalistlər sifarişlə iş görürlərsə bu jurnalistikaya ləkədir!!! Mən bütün jurnalistləri ürəkdən təbrik edirəm və hər kəsə xoşbəxt olmağı arzulayıram! /// yenilik.az
