Bakının tanınmış xəstəxanasından şikayət var.
Oxucular Mili.Az-a yazırlar ki, Mərkəzi Neftçilər Xəstəxanasının korpuslarında təmir işləri aparılır. Elə təmir getdiyi bir vaxtda, xəstələr antisanitariya şəraitində qəbul edilir.
Oxucu iddia edir ki, xəstəxananın hakimləri pasientləri faiz aldığı dərman şirkətlərinin dərmanlarından istifadəyə məcbur edir: "Şöbə müdiri olan həkim faiz aldığı dərmanı xəstəyə yazır və nəinki alternativ təklif edir, hələ "bizim bazarımıza girməyin" deyir".
Mərkəzi Neftçilər Xəstəxanasının baş direktor Leyla Seyidbəyova açıqlamasında bildirdi ki, belə məlumatları yayanlar onları sevməyənlərdir. Baş direktorun sözlərinə görə, xəstəxana əsaslı təmir olunub, fasad və həyət gözəldi. Heç bir antisanitariyadan söhbət gedə bilməz.
Həkimlərin firma dərman yazmasına gəlincə, L.Seyidbəyova bu iddianı kökündən təkzib etdi: "Biz yeganə xəstəxanayıq ki, firmalar içəri buraxılmır. Həkimlər dərman barədə biliklərini artırmaq istəyirsə, internet vasitəsilə edə bilər. Həm də həkimlərin firma dərmanlarından faiz götürməsinə ehtiyacları yoxdur. Bizim xəstəxanada əməkhaqqı yüksəkdir".
