Azərbaycanın ilk milli media monitorinq platformalarından biri olan "Mediatrends” genişlənmə strategiyasını davam etdirir.
AZXEBER.COM xəbər verir ki, bunu Osman Gündüz Mətbuat Şurasının Sosial Media İstifadəçiləri ilə Ələqələr Komissiyasının təşkilatçılığı ilə "Süni intellekt dövründə media monitorinqi və analitika: Mediatrends imkanları” mövzusunda keçirilən tədbir zamanı deyib.
Onun sözlərinə görə, yerli bazarda fəaliyyətə başlayan layihə artıq 52 ölkəni əhatə edən vahid qlobal platformaya çevrilib.
Platformanın inkişaf mərhələlərinə toxunan Osman Gündüz bildirib ki, "Mediatrends”in ilk layihəsi 2022-ci ildə fəaliyyətə başlayan mediatrends.az saytı olub. Milli media monitorinq platforması kimi yaradılan sayt hazırda da fəaliyyətini davam etdirir.
2023–2025-ci illərdə platforma regional bazarlara genişlənərək 7 ayrı domen üzərindən fəaliyyət göstərib. Bu mərhələdə müxtəlif ölkələr üçün lokal versiyalar və dil dəstəyi təmin olunub.
2026-cı ildə isə "Mediatrends Global” mərhələsinə keçid edilib. Platforma mediatrends.ai domeni üzərindən fəaliyyətini vahid qlobal sistemdə birləşdirib. Hazırda sistem 52 ölkəni və 44 dili əhatə edir və vahid idarəetmə paneli vasitəsilə fəaliyyət göstərir.
"Mediatrends” qlobal platforma kimi media monitorinqi və analitika sahəsində fəaliyyətini genişləndirməyə davam edir.
