Parisdə Fransa Milli Assambleyasının binasında Parisdəki Azərbaycan Evinin sədri Mirvari Fətəliyeva və azərbaycanlı tələbə Vüsal Hüseynоvun ermənipərəst mövqeyi ilə tanınan parlamentar Fransua Roşebloun və erməni diaspоrunun üzvləri tərəfindən vəhşicəsinə döyülməsinə etirazlar səngimək bilmir.
Məsələ ilə bağlı AZXEBER.COM-a açıqlama verən “İslahatçı Gənclər” İctimai Birliyinin sədri Fərid Şahbazlı qeyd edib ki, Parisdə baş verən bu hadisəni təsadüf hesab etmir: “Biz Fransanın bir sıra məsələlərə yanaşmada Azərbaycana olan qərəzli münasibətinə, ATƏT-in Minsk Qrupunun üzvü kimi Dağlıq Qarabağ münaqişəsinin həlli prosesində tutduğu ədalətsiz mövqeyə zaman-zaman şahidlik etmişik. Ancaq, başqa ölkələrə demokratiya, insan hüquqları mövzusunda moizələr oxuyan, ayrı-ayrı dövlətlərin daxili işlərinə müdaxilə etməklə təftiş edən bir ölkədə iki azərbaycanlının bir deputatın təşəbbüsü və iştirakı ilə döyülməsi və buna olan laqeyd münasibət əsl siyasi əxlaqsızlıqdır. Olayın üstündən artıq bir neçə gün keçib, ancaq bu cinayəti törədən və sifariş edənlər barəsində heç bir ciddi hüquqi ölçü götürülməyib. Bütün bu olanlardan sonra Fransa hansı mənəvi haqla başqa ölkələrdən demokratiya, insan hüquq və azadlıqlarının qorunmasını tələb edəcək? İki günahsız Azərbaycan gəncinin ermənipərəst mövqeyi ilə tanınan parlamentar Fransua Roşebloun iştirakı və təşəbbüsü ilə vəhşicəsinə döyülməsindən və bunun cəzasız qalmasından sonra biz hansı məntiqlə Fransanın Dağlıq Qarabağ münaqişəsinin həllində ədalətli mövqe tutmasını gözləyə bilərik?”
Fərid Şahbazlının sözlərinə görə, Azərbaycan parlamenti, bütün qeyri-hökümət təşkilatları və mediyası Parisdə həmvətənlilərimə qarşı törədilmiş bu cinayət əməlini sonadək diqqətdə saxlamalı və günahkarların layiqli cəzasına çatması üçün sonadək mübarizə aparmalıdır: “Yoxsa bu onsuzda ölkəmizə qarşı qərəzli mövqedə olan Fransada olduqca təhlükəli tendensiyanın əsasını qoya bilər”.
