Bakıda dələduzluq edən şirkət rəhbəri həbs edilib. Hüquq-mühafizə orqanlarından “Bizim Yol”a verilən məlumata görə, həmin şəxs 42 yaşlı Qənirə İsmayılovadır. O, 2 ay əvvəl Gəncə sakini, Rəna adlı qadından 103 min dollar alaraq mənimsəyib.
Q. İsmayılova fırıldaq əməlini həyata keçirmək üçün oğlunun xəstə olmasından istifadə edib. Guya onun oğlunun başında bədxassli şiş aşkarlanıb və bunun müalicəsi üçün külli miqdarda pul lazımdır. Pulu aldıqdan sonra isə Belarusa qaçıb. Həmin ölkədə həbs olunan Q. İsmayılova bir neçə gün əvvəl Azərbaycana ekstradisiya olunub.
İlkin dindirmə zamanı bildirib ki, dələduzluq yolu əldə etdiyi 103 min dolları oğlunun müalicəsinə xərcləsə də, uşaq dünyasını dəyişib. Fırıldaq əməli ilə əldə etdiyi qənimətin dəqiq məbləğini bilməyən Q. İsmayılova bunun 200 min dollardan çox olduğunu etiraf edib.
Qeyd edək ki, Q. İsmayılova əvvəllər 2 saylı Tibb Texnikumunda direktor müavini işləyib və o vaxt dələduzluq etdiyinə görə məhkəmədən cərimə ilə canını qurtara bilib. Hazırda fəaliyyət göstərməyən “Paşa” MMC-nin rəhbəridir. Faktla bağlı Cinayət Məcəlləsinin 178.2.4-cü (külli miqdarda ziyan vurmaqla dələduzluq etmə) maddəsi ilə cinayət işi başlanıb. Onun dələduzluq əməlinin qurbanlarının sayının artacağı ehtimal olunur.
