"Ermənistanın baş naziri Nikol Paşinyanın İtaliyanın "La Repubblica” nəşrinə müsahibəsində səsləndirdiyi "Biz bir gün ayılıb görəcəyik ki, Rusiya, ümumiyyətlə, Cənubi Qafqazda yoxdur” fikri Rusiyaya arxadan vurulan yeni bir zərbə və unudulmaz xəyanətin ifadəsidir. Bu bir daha sübut edir ki, Ermənistan hakimiyyəti Rusiyadan daha tez can qurtarmaq, Qərbin qoltuğuna sığınmaq arzusundadır. Öz arzusunu həqiqətə çevirmək üçün Paşinyan və komandası xeyli müddətdir ciddi cəhdlər göstərir, Rusiyanı Ermənistana dəstək verməməkdə, 44 günlük müharibə dövründə ona lazımi kömək göstərməməkdə, təcavüzkarların tərəfində hətta vuruşmamaqda günahlandırır”.
Bu sözləri AZXEBER.COM-a açıqlamasında Milli Məclisin deputatı Tahir Rzayev deyib.
Onun sözlərinə Ermənistan dövlətini Azərbaycan ərazisində yaradan və bu günə kimi ona ən çox dəstək verən Rusiyadır:
"Əgər Rusiya olmasaydı, Ermənistan dövlətinin varlığından, bu millətin harınlığından, təcavüzündən, silahlanmasından, Azərbaycan torpaqlarını işğal etməsindən söhbət gedə bilməzdi. Hazırda da Rusiya Ermənistanın arxasındadır, bu ölkənin ərazisində öz hərbi bazasını yerləşdirib, Ermənistanı silahla təmin edir, Qarabağ separatçılarına silah - sursat ötürülməsinə gizli yollarla imkan yaradır.
Dünyaya yaxşı məlumdur ki, Ermənistan Rusiyanın pol-postudur, onun quludur. Belə olan halda Paşinyanın söylədikləri təəccüb doğurmaya, insanı düşündürməyə bilməz. Bu fikirləri əlbəttə baş nazirin Qərbə yarınması, Avropanın dəstəyini qazanması, xarici dövlətlər qarşısında götürdüyü öhdəliklərə əməl etməsi kimi qiymətləndirmək də, Rusiyadan narazılıq şousu yaratmaq, Azərbaycanı arxayın salmaq kimi də dəyərləndirmək olar. Ancaq bütün hallarda Paşinyan səhv edir, yanılır”.
Deputat hesab edir ki, baş nazirin kimlərə xidmət etdiyi, hansı yolla getdiyi, söylədiklərinin nə məqsəd daşıdığı hamıya məlumdur.
"Nikol hələ də eyforiyadadır. Fransanın, Qərbin, NATO-nun bəzi əməkdaşlarının çaldığına oynayır, onların yalan, saxta vədlərinə uyub, xəyallar içərisindədir. Belə getsə, o yuxudan gec ayılacaq və ayılanda Ermənistanın yoxluğunu görəcəkdir. Azərbaycan Prezidenti cənab İlham Əliyev reallıqları, mövcud vəziyyəti, dünyada baş verən hadisələri zərgər dəqiqliyi ilə ölçüb - biçərək özünün balanslaşdırılmış siyasətini uğurla həyata keçirir, beynəlxalq aləmdə dövlətimizin nüfuzunu yüksəldir və Ermənistanın məğlubiyyətinə yollar açır”.
Şəbnəm Zahir
