Yay mövsümünün başa çatması ilə səyahət üçün yeni mövsüm başlayır. Payız aylarında mülayim hava şəraiti və bəzi istiqamətlərdə turist sıxlığının azalması xarici ölkələrə səfəri daha rahat edə bilər. Səyahət planlaşdıranlar isə seçim edərkən aviabilet, yerləşmə və gündəlik xərcləri nəzərə alırlar.
Bəs görəsən turistlər payız fəslində ən çox hansı ölkələrə səfərlər edirlər?
Turizm eksperti Samir Dübəndi AZXEBER.COM-a açıqlamasında deyib ki, payız səyahət üçün ən əlverişli dövrlərdən biridir:
"Payız səyahət üçün ən əlverişli dövrlərdən biridir. Yayın yüksək mövsümü başa çatır, bir çox istiqamətlərdə hava daha komfortlu olur, turist sıxlığı azalır. Azərbaycanlı turistlər üçün Türkiyə, Gürcüstan və Özbəkistan xüsusilə maraqlı seçimlərdir. İstanbul, Kapadokya, Tbilisi, Kaxeti, Səmərqənd və Buxara kimi istiqamətlər məhz payızda həm şəhər, həm mədəni, həm də qastronomik turizm baxımından cəlbedicidir. Cənubi Avropada isə İtaliya, İspaniya, Yunanıstan və Portuqaliya sentyabrın sonundan noyabradək yaxşı alternativlərdir. 2026-cı ilin beynəlxalq tendensiyalarında da turistlərin seçimində qiymətlə yanaşı təhlükəsizlik, iqlim komfortu və "value for money” – yəni ödənilən pula görə alınan dəyər daha mühüm rol oynayır. Avropa Səyahət Komissiyasının məlumatına görə, iyun–noyabr 2026 dövründə avropalıların 81%-i səyahət etməyi planlaşdırıb və Cənubi Avropa ilə Aralıq dənizi istiqamətləri yüksək tələbatı qoruyur”.
O qeyd edib ki, Azərbaycan vətəndaşları üçün Türkiyə, Gürcüstan, Özbəkistan və Qazaxıstan - çox vaxt daha rasional seçim olur:
"Payız fəslində səyahət üçün "sərfəli” anlayışına yalnız hotelin qiyməti ilə baxmaq düzgün deyil. Aviabilet, viza, baqaj, transfer, yerləşmə, qidalanma və yerli nəqliyyat birlikdə hesablanmalıdır. Bu baxımdan Azərbaycan vətəndaşları üçün vizasız və nisbətən yaxın istiqamətlər – Türkiyə, Gürcüstan, Özbəkistan və Qazaxıstan – çox vaxt daha rasional seçim olur. Azərbaycan vətəndaşları Gürcüstan, Özbəkistan və Qazaxıstana 90 günədək vizasız səfər edə bilirlər; Türkiyə də Azərbaycan vətəndaşları üçün 90 günədək vizasız rejim tətbiq edir. Amma payızın avtomatik olaraq "ucuz mövsüm” olduğunu demək də düzgün olmazdı. Dünyada shoulder season – yəni yay və qış pik mövsümləri arasındakı dövrə maraq artır və bu, bəzi populyar şəhərlərdə qiymətlərin əvvəlki illərdəki qədər enməməsinə səbəb olur. Ona görə də ən sərfəli variant konkret tarixlər üzrə aviabilet və otel qiymətlərini müqayisə etməklə müəyyən edilməlidir. Azərbaycanın 2026–2030-cu illər üzrə Dövlət Proqramında da qlobal turizm davranışında təbiət və mədəni irs təcrübələrinə marağın artdığı, eyni zamanda turist seçimlərinə iqlim və digər yeni faktorların daha çox təsir göstərdiyi qeyd olunur”.
Turizm eksperti Rəhman Quliyev AZXEBER.COM-a açıqlamasında deyib ki, payız fəsli səyahət üçün kifayət qədər əlverişli dövr hesab olunur:
"Payız fəsli səyahət üçün kifayət qədər əlverişli dövr hesab olunur və bu mövsümdə həm hava şəraiti, həm də qiymət baxımından müxtəlif seçimlər mövcuddur. Məncə, payız aylarında xüsusilə Türkiyə, İtaliya, İspaniya, Yunanıstan və Portuqaliya kimi ölkələrə səfərlər maraqlı seçim ola bilər. Bu dövrdə Avropanın bir çox şəhərlərində yay mövsümünə nisbətən turist sıxlığı azalır və tarixi-mədəni məkanları daha rahat ziyarət etmək mümkündür. Təbiət və sakit istirahət sevənlər üçün Gürcüstan, Şimali Kipr və Balkan ölkələri də uyğun istiqamətlərdir. Payızda şəhər turizmi ilə yanaşı, qastronomik, mədəni və təbiət turizminə maraq da artır. Azərbaycan turistləri üçün istiqamət seçərkən birbaşa uçuşların mövcudluğu, viza şərtləri və ümumi səyahət büdcəsi də nəzərə alınmalıdır. Eyni zamanda, mövsümi endirimlərdən və erkən rezervasiya imkanlarından istifadə etməklə səfər xərclərini azaltmaq mümkündür. Əsas məsələ turistin öz marağına, büdcəsinə və səfər məqsədinə uyğun istiqamət seçməsidir”.
Şahanə Ziyad
