İşgəncələrə Əleyhinə Azərbaycan Komitəsinin sədri Elçin Behbudov sosial şəbəkələrdə yayılan, bir qadının polis əməkdaşı tərəfindən zorakılığa məruz qalmasını əks etdirən videogörüntü ilə bağlı araşdırma aparıb. Bu barədə hüquq müdafiəçisinin özü məlumat verib. Onun sözlərinə görə, o, Gəncədə həmin qadınlar görüşüb:“Görüntüdəki qadın 1982-ci il təvəllüdlü Gəncə sakini Zeynalova Elnarə Səməndər qızıdır. Mən həmin qadınla görüşərək polisin müdaxiləsi olmadan söhbət etdim. O, bildirdi ki, polis əməkdaşları ona zorakılıq etməyib. Mən onun dediyini deyirəm. Onun nə dərəcədə səmimi olduğunu söyləyə bilmərəm. Elnarənin sözlərinə görə, içkili olub və tanışı Nofəllə dalaşaraq özünə qəsd etmək istəyib. Bunu görən polis əməkdaşları isə ona mane olub. O polisə tabe olmayıb. Nəticədə polislər onu zorla idarəyə aparmağa məcbur olublar. Elnarə Zeynalova onu da dedi ki, həmin videonu çəkənləri məhkəməyə verəcək”.Bəzi məlumatlara görə isə Elnarə Zeynalova özünü sığortalamaq üçün belə açıqlamalar verir. O, törətdiyi əmələ görə həbs ediləcəyindən ehtiyatlanır və polisə jest etməklə özünü qorumaq istəyir. Xatırladaq ki, Elnarə Zeynalovanın Nofəl adlı şəxslə aralarında problemin olması barədə ilk açıqlamanı “Azadlıq”a Gəncə şəhər baş polis idarəsinin rəisi Rasim Musayev vermişdi. Polis rəisi bildirmişdi ki, Elnarə Zeynalova Nofəlin evinə hücum çəkib. Və Nofəlin ailə üzvləri ilə onun arasında insident yaranıb. Qonşular hadisə ilə bağlı polisə məlumat veriblər və əraziyə əməliyyat qrupu göndərilib. Nofəlin qardaşı Ramin “Azadlıq”a açıqlamasında Rasim Musayevin söylədiklərini təsdiqləmişdi.“Azadlıq” qəzeti