AZXEBER.COM-un AzTV-yə istinadən verdiyi məlumata görə, prezident ötən illərdə Azərbaycan iqtisadiyyatının və respublikanın bütün regionlarının uğurla inkişaf etdiyini, qeyri-neft sektorunun daha da inkişafı üçün ardıcıl tədbirlərin həyata keçirildiyini, sosial və infrastruktur layihələrinin hamısının tətbiqini tapdığını vurğulayıb.
Dövlət başçısı ölkəmizdə nəinki regionda, Şərqi Avropada analoqu olmayan Ağcabədi Süd Məhsulları Kombinatı kimi müəssisələrin fəaliyyətə başlamasının mühüm əhəmiyyətini qeyd edib. Ötən 7 ildə 1 milyona qədər yeni iş yerinin yaradıldığını bildirən prezident 2013-cü ilə qədər respublikamızda regional inkişaf proqramına uyğun olaraq bütün əsas iqtisadi, sosial və infrastruktur məsələlərinin həllini tapacağını deyib. Dövlət başçısı sahibkarlığın hərtərəfli dəstəklənməsi üçün kompleks tədbirlərin bundan sonra daha da gücləndiriləcəyini vurğulayıb, iş adamlarına rəqabətə-davamlı məhsullar istehsalını genişləndirməyi və xarici bazarlara daha çox əmtəə çıxarmağı tövsiyə edib.
Prezident İlham Əliyev inhisarçılığın, qeyri-sağlam rəqabətin, süni qiymət artımının qarşısının alınması və yerli bazarın keyfiyyətli məhsullarla təminatı üçün ardıcıl tədbirlər görüldüyünü qeyd edib.
Kənd təsərrüfatı naziri İsmət Abbasov aqrar-sənaye kompleksində islahatların davam etdirildiyini vurğulayıb. 2004-cü illə müqayisədə 2010-cu ildə kənd təsərrüfatının 2,6 dəfə artdığını bildirən nazir dövlətin hərtərəfli dəstəyi, ayrılan güzəştli kreditlər və subsidiyalar hesabına ötən illərdə aqrar-sənaye kompleksinin əsaslı inkişaf yolu keçdiyini və bu sahədə yeni keyfiyyət mərhələsinin başlandığını deyib. O, taxılçılıq, heyvandarlıq və digər sahələrdə qazanılan uğurları ətraflı xarakterizə etdi və aqrar elminin potensialının gücləndirilməsinin vacibliyini diqqətə çatdırıb.
İqtisadi İnkişaf Nazirliyinin Sahibkarlığa Kömək Milli Fondunun icraçı direktoru Şirzad Abdullayev cari ildə sahibkarlara 125 milyon manat güzəştli kreditin veriləcəyini, artıq bunun bir hissəsinin iş adamlarına çatdırıldığını, ümumi məbləğin təqribən 75 faizinin regionların payına düşdüyünü deyib.
Prezident İlham Əliyev qalan güzəştli kreditlərin də verilməsinin sürətləndirilməsi barədə tapşırıq verib. O, növbəti ildən başlayaraq güzəştli kreditlərin həcminin, həmçinin, ayrılan kreditlərin məbləği ilə bağlı limitin artırılmasının məqsədəuyğunluğunu vurğulayıb. Kənd təsərrüfatının inkişafının dövlətin başlıca prioritetlərindən biri olduğunu deyən dövlət başçısı regionlarda aqrar-sənaye kompleksinin köklü şəkildə inkişafı, infrastruktur və sosial yönümlü tədbirlərin daha da genişləndirilməsi ilə bağlı tapşırıqlarını verib.
Prezident bundan sonra aqrar elminin inkişafına da xüsusi diqqət yetiriləcəyini vurğulayıb. Müşavirəyə yekun vuran dövlət başçısı aqrar-sənaye kompleksində islahatların reallaşdırılması zamanı kompleks yanaşmanın və hərtərəfli koordinasiyanın başlıca meyar olduğunu bildirib, yeni-yeni nailiyyətlər arzulayıb.
