"Məni çox incitdilər, çox qırdılar. Söz verdilər, ümid verdilər, 9 ay məni gözləmədə saxladılar. Amma mən haqqımı halal edirəm. Sərt ifadələr işlətmişəm, bəlkə də buna məni məcbur ediblər. Həddimi aşdığım heç nə ilə qürur duymuram. Heç kimlə Sirat körpüsündə iki saat halallaşmaq istəmirəm - mən hər şeyi halal edirəm. Balaş bəyə uzun ömür və can sağlığı arzu edirəm. İTV rəhbəri Balaş bəylə isə heç vaxt barışmayacağam".
AZXEBER.COM xəbər verir ki, bu sözləri aktyor, rejissor Kənan Mahmudov "facebook" hesabında yazıb.
Aktyor telekanalla aralarında olan qalmaqala son dəfə münasibət bildirərək fikirlərini ifadə edib:
"Mənim Balaş bəylə fərdi, şəxsi olaraq heç bir problemim yoxdur. Otağında çay içmişəm, məni hörmətlə qarşılayıb. Çox mədəni insandır. Diqqətimi çəkən əsas məqam isə danışdığım ideyalara diqqətlə qulaq asması idi.
Ortaya bir sual çıxır: bəs mənim problemim nədir?
Mənim problemim İTV rəhbəri Balaş bəyin ayrı-seçkiliyi, ögey yanaşmasıdır. Yəni bu halda İTV rəhbərinin adı kim olsaydı, problemim həmin şəxsin bu sistemi ilə olacaqdı.
Balaş bəyin İTV üçün etdiyi fədakarlığı heç bir vicdanlı insan dana bilməz. Hər şey ortadadır: iş var, keyfiyyət var, təbii ki, maliyyə də var. Hər kəs bilir ki, İTV-yə aid olan bütün serialları paylaşmışam (onlar paylaşmasa belə) və bundan peşman deyiləm.
Məni tanıyanlar bilir ki, yeri gələndə üzr istəməyi bacaran insanam, amma haqqını da tələb edən insanam. 9 ay telefonlarıma cavab verilmədi, ortaq dostlarımız bizi görüşdürə bilmədi. "Ssenari əladır” dedilər və mən 9 ay işsiz qaldım. Rejissorun əsas gəlir yeri televiziya kanallarıdır.
Allah şahiddir, Balaş bəyi İTV-dən kənarda harada görsəm, qarşısına keçib əlimi uzadar, görüşərəm. İTV-də olan Balaş bəyi isə orada unudaram. Amma İTV-də olan Balaş bəylə sistemə qarşı apardığım mübarizədən vaz keçmərəm.
Balaş bəyin oradan getməsini heç istəmirəm. İndi mənimlə yola getmir deyə, onun göstərdiyi fədakarlığa göz yumacaq qədər əqidəsiz deyiləm. Çox istədim ki, yaradıcılıq dostluğumuz davam etsin, amma bəy bunu qəbul etmədi. Ən maraqlısı isə bu səbəbi mən 9 ay bilmədim. İnsanlar danışaraq anlaşırlar, biz isə danışa bilmədik.
Bu yaxınlarda ölümdən döndüm - bildiyiniz, həqiqi mənada. (Dostlarım bilir.) Özümə gəldiyim zaman isə bir daha anladım ki, dünyada heç nə bizim deyil, biz həyatın qarşısında çox acizik. Kaş bunu hər kəs anlaya.
Bəli, məni çox incitdilər, çox qırdılar. Söz verdilər, ümid verdilər, 9 ay məni gözləmədə saxladılar. Amma mən haqqımı halal edirəm. Sərt ifadələr işlətmişəm, bəlkə də buna məni məcbur ediblər. Həddimi aşdığım heç nə ilə qürur duymuram. Heç kimlə Sirat körpüsündə iki saat halallaşmaq istəmirəm - mən hər şeyi halal edirəm.
Vəzifə müvəqqəti məqamdır: bu gün var, sabah yox. Təkrar edirəm, Balaş bəyin getməsi və ya qalması mənim üçün önəmlidir. Hansı halda üzülərəm? Yerinə bu uğuru davam etdirə bilməyən biri gələrsə.
İnsanın haqqını danmaq olmaz. Amma kaş ki, mənə də bir şans verərdi. Yəqin ki, Allahın mənim üçün başqa planları var. Ölkəmizdə olan bütün kanallara yaradıcılıq uğurları arzulayıram. Balaş bəyə haqqımda çatdırılan yalan məlumatların həqiqətini bilən insanları vicdanları ilə baş-başa buraxıram. Həyat bumeranqdır. Balaş bəyə uzun ömür və can sağlığı arzu edirəm. İTV rəhbəri Balaş bəylə isə heç vaxt barışmayacağam".
Aysel
