Tanınmış ədəbiyyatşünas alim, tənqidçi və publisist, filologiya elmləri doktoru, professor, əməkdar jurnalist Şamil Vəliyevin müəllifliyi ilə iki cilddən ibarət «Azərbaycan ədəbiyyatı və mətbuatından araşdırmalar» kitabı işıq üzü görüb.
BDU-nun Mətbuat və informasiya şöbəsindən AZXEBER.COM-a verilən məlumata görə, birinci cilddə (1985-2000) XX əsr Azərbaycan tənqidində klassik poeziya, eyni zamanda yeni şeir haqqında estetik konsepsiyanın formalaşması məsələləri öz əksini tapır. İkinci cild (2000-2010) dövrü mətbuatda çıxan materialları əhatə edir. Kitablara həmçinin professor Ş.Vəliyevin müxtəlif illərdə nəşr olunan monoqrafiya, portret-oçerk, elmi-nəzəri və publisistik məqalə, resenziya, müsahibə, məktub və şəxsi arxivindən seçmələr daxildir. Bu əsərlərdə mətbuat və jurnalistikanın dünəni və bu günü haqqında söhbət açılır, ədəbi tənqid və poeziya barədə araşdırmalar əsaslı yer tutur, zəngin fakt, hadisə, şəxsiyyət və problemlər kontekstində irs-varislik əlaqələri tədqiq olunur. “Elm və təhsil” nəşriyyatında işıq üzü görən kitabın redaktoru filologiya elmləri doktoru, professor Alxan Bayramoğlu, toplayıb nəşrə hazırlayanlar isə filologiya üzrə fəlsəfə doktoru Aygün Əzimova, o cümlədən Afaq Sadıxova və Nülufər Vəliyevadır.
