İnsanların çoxu maliyyə problemlərini yalnız az pul qazanmaqla əlaqələndirir. Amma əslində bəzən problem qazancın miqdarında deyil, həmin pulun necə idarə olunmasındadır.
AZXEBER.COM xəbər verir ki, yüksək gəlir əldə edən insanların da maliyyə çətinliyi yaşamasının əsas səbəblərindən biri xərclərə nəzarət etməməkdir.
Pul idarəçiliyi sadəcə qənaət etmək demək deyil. Bu, qazandığın pulu düzgün bölmək, prioritetləri müəyyən etmək və gələcəyi düşünərək qərar vermək bacarığıdır. Məsələn, insan qazancının hamısını gündəlik ehtiyaclara və istəklərə xərcləyirsə, nə qədər çox qazansa da, uzun müddətdə maliyyə təhlükəsizliyi yarada bilməz.
Kiçik məbləğlərlə başlayan qənaət belə zamanla böyük fərq yaradır. Hər ay gəlirin müəyyən hissəsini kənara qoymaq, lazımsız alış-verişlərdən çəkinmək və xərcləri izləmək insanın maliyyə vəziyyətini daha stabil edir.
Bir çox insan əvvəlcə maaşını alır, sonra qalan pulla qənaət etməyə çalışır. Daha düzgün yanaşma isə əvvəlcə gəlirin bir hissəsini gələcək üçün ayırmaq, sonra qalan məbləği planlı şəkildə xərcləməkdir.
Pulun miqdarı qədər onunla davranış da önəmlidir. Pulunu idarə etməyi bacaran insan az gəlirlə belə düzgün maliyyə vərdişləri yarada bilər, amma idarə etməyi bilməyən insan yüksək gəlirlə belə çətinlik yaşaya bilər.
Əsl maliyyə uğuru yalnız çox qazanmaq deyil, qazandığını qorumaq, artırmaq və düzgün istifadə etmək bacarığıdır.
Şahanə Ziyad
