Xəbər verdiyimiz kimi, ABŞ Silahlı Qüvvələri yanvarın 3-də Venesuelada gecə əməliyyatı keçirərək, ölkənin uzun müddət lideri olmuş Nikolas Maduro ilə həyat yoldaşı Cilia Floresi tutularaq birbaşa Nyu‑Yorka aparılıb.
Venesuela Prezidenti Nikolas Maduronun saxlanılması beynəlxalq müstəvidə geniş rezonans doğurub. Maduro tutulmasını "qanunsuz girovluq və işğal” kimi qınayıb və özünü hələ də legitim prezident adlandırıb. Bu, hadisə Rusiya üçün böyük geopolitik itki hesab olunur. Çünki Maduro uzun müddət Kreml üçün Latın Amerikasında ən vacib müttəfiqlərdən biri idi. Rusiya Maduro rejimini siyasi, iqtisadi və hərbi baxımdan dəstəkləyirdi və bu ölkə ilə əməkdaşlıq onun Qərb qarşısında nüfuzunu gücləndirirdi. Moskva bu əməliyyata kəskin etiraz etsə də, real hərbi müdaxilə edə bilməyib. Bu isə Kremlin xarici siyasət imkanlarının məhdud olduğunu göstərir və nüfuz itkisinə yol açır.
Milli Məclisin deputatı Elman Nəsirov AZXEBER.COM-a bildirib ki, artıq Moskva ilə Vaşinqton arasındakı qarşıdurmanın mahiyyəti bəlli olur:
"Rusiya-Ukrayna müharibəsi fonunda Moskva ilə Vaşinqton arasındakı qarşıdurmanın mahiyyəti artıq daha aydın görünməyə başlayır. Rəsmi Moskva nüvə silahına malik olması ilə öyünür və lazım gəldikdə bunu tətbiq edəcəyi ilə bağlı açıq hədələr səsləndirir. Lakin son baş verən hadisələr göstərir ki, Rusiya beynəlxalq aləmdəki mövqelərini kifayət qədər qoruyub saxlaya bilmir. Birincisi, 2024-cü ilin dekabrında Bəşər Əsədin devrilməsi və Moskvada sığınacaq tapması göstərdi ki, Rusiya Yaxın Şərqdə mövqelərini tam gücləndirə bilmədi və müttəfiqini hakimiyyətdə saxlaya bilmədi”.
Parlamentari deyib ki, belə hadisələr zaman-zaman baş verib:
"Keçmiş İraq Prezidenti Səddam Hüseynlə bağlı da 2003-cü ildə də oxşar vəziyyət yaşanmışdı. Onun Sovet İttifaqı dövründən başlayaraq, Rusiyanın əməli siyasətində İraqda xüsusi maraqlar mövcud idi. Moskva Səddam Hüseyn rejimini hər zaman müdafiə edirdi. Lakin o da sona qədər müdafiə edilə bilmədi və yarımçıq qaldı. Daha sonra Liviyanın sabiq başçısı Müəmmər Qəddafi ilə Moskvanın isti münasibətləri hamıya məlum idi. Ancaq o da hakimiyyətdən uzaqlaşdırıldı və Səddam Hüseynin acı taleyini yaşadı”.
Deputat bildirib ki, Rusiyanın beynəlxalq aləmdə mövqeləri zəifləyir:
"Madura ilə Moskvanın çox sıx əlaqələri vardı, onu açıq şəkildə dəstəkləyirdi və hətta Moskva Vaşinqtonu hədələyərkən, Venesueladan mümkün zərbələr üçün təzyiq mexanizmlərini işə salırdı. Lakin Madura da devrildi. Bütün bunlar göstərir ki, Rusiyanın beynəlxalq aləmdə mövqeləri bir-bir zəifləyir və nüfuz imkanları daralır. Rusiya yeni dünya nizamının formalaşma mərhələsində zəif aktor kimi çıxış edir”.
Şahanə Ziyad
