Sayt bildirir ki, informasiya Rusiyanın hakim dairələrindən əldə olunub. 

Məsələyə münasibət bildirən millət vəkili Zahid Oruc bildirdi ki, dövlət başçılarının səfərlərini ümumi məsələlərə, konkret olaraq medianın irəli sürdüyü versiyalara bağlamaq düzgün deyil. “Yeni Müsavat” qəzeti ictimai-siyasi fikrin formalaşması üçün daim məlumat paylaşımları edir, amma Putinin Azərbaycana səfəri əvvəlcədən müəyyənləşib. 

Zahid Orucun sözlərinə görə dövlət başçıları bu barədə artıq razılığa gəliblər və Putinin Azərbaycan səfəri də qrafiklə nəzərdə tutulub. Bununla bağlı hazırlıq üzrə işçi qrupları iş aparırlar: “Ona görə də zənn etmirəm ki, Kreml Avrasiya İttifaqını məhz Azərbaycandan başlayaraq formalaşdıracaq. Avrasiya İttifaqı ilə bağlı hələlik həll olunmamış kifayət qədər problemlər var, ona görə də məsələni ən adi detallarla xarakterizə etmək səhvdir. Avrasiya ittifaqı hələ yaradılmayıb ki, Azərbaycanı da tələsdirələr ki, gəl sən də qol çək?! Putinin cənab İlham Əliyevlə heç bir problemi yoxdur. Rusiya-Azərbaycan əlaqələri də normal məcrada inkişaf edir. Seçki məsələlərinə görə Rusiya-Azərbaycan əlaqələrini şişirdənlər bilməlidirlər ki, dövr artıq dəyişib. Onların siyasi yanaşmaları, düşüncələri bu şəraitə, regional reallıqlara uyğunlaşmalıdır. Əgər kimsə öz taleyini Kremldən alacağı arayışa bağlayırsa, bu onların öz problemidir. Bunun seçkilərlə heç bir əlaqəsi yoxdur. 

Sabah tutaq ki, Milli Şuranın o təmsilçisi həmin sənədlə təmin olunanda, bu avtomatik onun seçki üçün mühüm bir dövlətdən kartplanş alması deməkdir? Burada hələ imza toplanma var, bunun üçün də heç bir hüquqi müstəvi yoxdur. Son 10 ili ölkədə yaşamaması problemi də tətbiq olunanada ortada tamam ayrı vəziyyət yaranacaq. Başqa bir namizədin üzərində dayansalar, yenə də 40-50 min imzanı toplamaq lazımdır ki, seçki marafonuna qoşula biləsən. Seçki mövzusunda qeyri-real versiyalar siyasi həyatımıza hər gün daxil olur. Ən çox bu qabardılırsa ki, Rusiyanın guya bu seçkilərlə bağlı əlahiddə bir özəl planı var və o iqtisadi senatdan hər hansı bir şəxsi lidri kimi gətirib bu xalqa prezident kimi təqdim edəcək, hesab edirəm ki, bu 80-ci illərin yanaşmasıdır”.